Friday, 15 September, 2006, 10:55 GMT 15:55 PST

سیکرٹری جنرل کے مقبول امیدوار

اقوام متحدہ کے سیکرٹری جنرل کے عہدے کی دوڑ میں جنوبی کوریا کے وزیرخارجہ بین کیمون دیگر امیدواروں کے مقابلے میں سب سے آگے ہیں۔

سلامتی کونسل کے اراکین نے بتایا کہ جمعرات کو کرائے جانے والے ایک ’اسٹرا پول‘ یعنی غیررسمی رائے شماری میں بین کیمون سب سے مقبول امیدوار کی حیثیت سے ابھر کر سامنے آئے۔

وہ بھارتی امیدوار ششی تھروو جو کہ اقوام متحدہ کے اہلکار ہیں اور تھائی لینڈ کے نائب وزیر خارجہ سوراکیارت ستھیرتھائی سے بھی مقبول امیدوار ثابت ہوئے۔

اقوام متحدہ کے موجودہ سیکرٹری جنرل کوفی عنان اکتیس دسبمر کو دس سال کے بعد اپنے عہدے کی مدت پوری کررہے ہیں۔

گزشتہ جولائی میں بھی ایک رائے شماری کرائی گئی تھی جس میں جنوبی کوریا کے وزیر خارجہ سب سے مقبول امیدوار کی حیثیت سے ابھر کر سامنے آئے تھے لیکن اس بار ایک فرق ہے۔

سفارت کاروں کا کہنا ہے کہ اگرچہ بین کیمون مقبول ثابت ہوئے ہیں لیکن اس سے حتمی نتیجہ اخذ کرنے میں احتیاط کی ضرورت ہے کیوں کہ سیکرٹری جنرل کے انتخاب کا عمل جیسے جیسے قریب آتا ہے امیدواروں کی مقبولیت بھی متاثر ہوسکتی ہے۔

عام طور پر سکیورٹی کونسل کے اراکین سیکرٹری جنرل کا انتخاب کرتے ہیں لیکن اس بار ایسے ممالک سے بھی مشورہ لینے کی کوشش کی جارہی ہے جو سلامتی کونسل کے رکن نہیں ہیں۔ اس بات پر کم سے کم اتفاق ہے کہ جو بھی سیکرٹری جنرل بنے اس کا تعلق ایشیا سے ہو۔

اگر اردن کے شہزادہ الحسین سیکرٹری جنرل بننے میں کامیاب ہوتے ہیں تو یہ پہلی بار ہوگا کہ کوئی مسلم اقوام متحدہ کا سربراہ ہوگا۔ امیدواروں کی فہرست میں پانچ افراد ہیں جن کی تفصیل کچھ یوں ہے۔

بن کیمون، جنوبی کوریا
بن کیمون جنوبی کوریا کے وزیر خارجہ ہیں اور اب تک سب سے مقبول امیدوار ہیں۔ ان کی عمر باسٹھ سال ہے اور ماضی میں وہ اقوام متحدہ میں جنوبی کوریا کے مشن اور واشنگٹن میں اس کے سفارت خانے میں کام کرچکے ہیں۔

شہزادہ زید الحسین، اردن

	اگر منتخب ہوئے تو اردن کے امیدوار اقوام متحدہ کے پہلے سربراہ ہوں گے

زید الحسین اس وقت اقوام متحدہ میں اردن کے سفیر ہیں اور سفارتی حلقوں میں ان کی کافی عزت ہے۔ ان کی عمر بیالیس سال ہے اور وہ اقوام متحدہ کے امن مشن میں کام کرچکے ہیں۔ انہوں نے حال ہی میں کہا کہ سلامتی کونسل اور جنرل اسمبلی ایک مسلم امیدوار پر غور کرے جو کہ اقوام متحدہ سے واقف تو ہے لیکن اس سے منسلک نہیں ہے۔

ششی تھرور، انڈیا
بھارتی امیدوار ششی تھرور لگ بھگ تین عشروں سے اقوام متحدہ میں کام کرتے رہے ہیں۔ وہ پیشہ ور سفارت کار ہیں۔ ان کی عمر پچاس سال ہے اور اس وقت وہ اقوام متحدہ کے انڈر سیکرٹری جنرل برائے اطلاعات ہیں۔ وہ اچھے مقرر ہیں، انہیں کوفی عنان کا قریبی سمجھا جاتا ہے۔ رائے شماری کے مطابق وہ مقبولیت میں دوسرے نمبر پر ہیں۔

سوراکیارت ستھیرتھائی، تھائی لینڈ
تھائی لینڈ کے اڑتالیس سالہ نائب وزیر اعظم سوراکیارت ستھیرتھائی کو جنوب مشرقی ممالک کی تنظیم آسیان کے دس رکن ممالک کی حمایت حاصل ہے۔ وہ وزیر خارجہ رہے ہیں اور تھائی لینڈ کے سب سے کم عمر وزیر خزانہ بھی۔ ہارورڈ یونیورسٹی سے قانون میں ڈاکٹریٹ حاصل کرنے والے تھائی لینڈ کے پہلے شہری ہیں۔

جینتھا دھاناپالا، سری لنکا
جینتھا دھاناپالا ایک سینیئر سفارتکار ہیں اور بین الاقوامی سطح پر کام کرتے رہے ہیں۔ اس وقت وہ سری لنکا کے صدر کے مشیر ہیں۔ وہ اقوام متحدہ میں اعلیٰ عہدوں پر کام کرچکے ہیں اور اس طرح اقوام متحدہ سے پوری طرح واقف ہیں۔ ان کی عمر سڑسٹھ سال ہے۔