Friday, 07 July, 2006, 07:55 GMT 12:55 PST

’ایران پیکج کا جلد جواب دے‘

اقوام متحدہ کے جوہری توانائی کے ادارے نے ایران کو خبردار کیا ہے کہ جوہری پروگرام ختم کرنے کے عوض بین الاقوامی برادری کی طرف سے اس کے لیے مراعات کا جو اعلان کیا گیا تھا اس کے بارے میں جواب نہ دینے سے عالمی برادری کے صبر کا پیمانہ لبریز ہو رہا ہے۔

جوہری توانائی کے عدم پھیلاؤ کے عالمی ادارے آئی اے ای اے کے سربراہ محمد البرداعی نے کہا ہے کہ مراعات کے اس پیکج کا ایران جس قدر جلد جواب دے اتنا ہی اچھا ہے۔

البرداعی کی طرف سے یہ بیان ایسے وقت سامنے آیا ہے جب ایران کے جوہری معاملات پر مذاکرات کارِ اعلی یورپی برادری سے مذاکرات کے لیئے برسلز پہنچے ہیں۔

ایران نے بین الاقوامی برادری کی طرف سے اعلان کردہ مراعات کے پیکج پر ابتدائی طور پر مثبت ردعمل کا اظہار کیا تھا تاہم انہوں نے کہا تھا کہ اس میں کچھ ابہام پایا جاتا ہے۔

واشنگٹن میں وائٹ ہاوس کے ترجمان نے کہا کہ ایران کو مراعات کےپیکج کا جواب دینا چاہیے۔

برطانوی خبر رساں ادارے رائٹرز کے مطابق سین میکروماک نے کہا کہ امریکہ، روس، چین، برطانیہ، فرانس، جرمنی اور یورپی یونین کے وزراء خارجہ آئندہ بدھ کو ایران کے خلاف ممکنہ اقدامات پر غور کریں گے۔

علی لارے جانی یورپی وزیر خارجہ ہاویر سولانہ سے ایک ضیافت میں غیر رسمی بات چیت کریں گے جبکہ باضابط مذاکرات اگلے ہفتے سے شروع ہوں گے۔

ایران نے بین الاقوامی برادری کی طرف سے اعلان کردہ مراعات کے پیکج پر ابتدائی طور پر مثبت ردعمل کا اظہار کیا تھا تاہم ایران نے کہا تھا کہ اس میں کچھ ابہام پایا جاتا ہے۔

تاہم ایران کوان مراعات پر باضابط جواب دینا ہے۔ تہران میں سرکاری اہلکاروں نے اشارے دیئے ہیں کہ ایران اگست کے وسط تک مراعات کے اس پیکج کا جواب دے دے گا۔