Wednesday, 05 July, 2006, 11:38 GMT 16:38 PST

’ورلڈ کپ میچ دیکھنے پر قتل‘

اطلاعات کے مطابق وسطی صومالیہ کے ایک سنیما میں فٹبال کے عالمی کپ کا میچ دیکھنے والے افراد پر اسلامی شدت پسندوں کی فائرنگ سے دو افراد ہلاک ہوگئے۔

مرنے والوں میں سنیما کا مالک اور ایک نوجوان لڑکی شامل ہیں۔

صومالیہ کے کچھ حصوں پرگزشتہ ماہ یونین آف اسلامک کورٹس نامی ملیشیا کے قبضے کے بعد شریعت کے قوانین نافذ کر دیئے گئے ہیں جن میں ورلڈ کپ کی نشریات پر پابندی بھی شامل ہے کیونکہ ان میچوں کے دوران شراب کے اشتہارات نشر کیئے جاتےہیں۔

ایک صومالی نیوز نیٹ ورک کے مطابق مسلح افراد نے وسطی گلگادد ضلع کے دھوسا مریب نامی قصبے میں ایک ایسے سنیما گھر کو بند کرانے کی کوشش کی جہاں لوگ جرمنی اور اٹلی کا سیمی فائنل میچ دیکھ رہے تھے۔

اس پر کچھ فٹبال شائقین نے احتجاج کیا اور انہیں منتشر کرنے کے لیئے مسلح افراد نے ہوائی فائرنگ کی۔ ہجوم کو منتشر کرنے میں ناکامی پر یہ لوگ مشتعل ہوگئے اور انہوں نےہجوم پر گولی چلا دی۔

صومالیہ میں سنہ 1992 کے بعد سے کوئی باقاعدہ حکومت قائم نہیں ہو سکی تھی اور اب اسلامک کورٹس نے صومالیہ کے بڑے علاقے کا انتظام سنبھال کر وہاں حکومت قائم کی ہے۔