Sunday, 14 May, 2006, 08:01 GMT 13:01 PST

پروگرام روکنے والی پیشکش نامنظور

ایران کے صدر احمدی نژاد نے کہا ہے کہ ان کے ملک کو کوئی ایسی پیشکش قبول نہیں ہو گی جس کے تحت ان کو اپنا ’پر امن‘ جوہری پروگرام بند کرنا پڑے۔

تین یورپی ممالک برطانیہ، فرانس اور جرمنی ایران کو یورینیم کی افزودگی روکنے پر آمادہ کرنے کے لیے اسے مختلف قسم کی پیشکش کر رہے ہیں۔ ان تینوں ممالک کے وزرائے خارجہ پیر کو اس مسئلے پر بات چیت کے لیے ملاقات کر رہے ہیں۔

اس سے قبل جوہری معاملات پر نظر رکھنے والے ادارے آئی اے ای اے نے کہا تھا کہ یورپ کی طرف سے مسئلے کے حل کی کوشش مثبت اقدام ہے۔ ادارے کےسربراہ محمد البرادعی نے کہا ہے کہ یورپی یونین ایران کو یورینیم کی افزودگی کے سے روکنے کے لیے جو پیشکش کرنے کا ارادہ رکھتی ہے وہ جامع اور دلیرانہ ہونی چاہیے۔

کچھ مغربی ممالک کے خیال میں ایران جوہری ہتھیار بنانا چاہتا ہے لیکن ایران اس بات کی تردید کرتا ہے۔

بی بی سی کے نمائندے جوناتھن چارلس کا کہنا ہے کہ ایران کو جوہری توانائی خود تیار کرنے کی بجائے درآمد کرنے پر آمادہ کرنے کی کوشش کی جائے گی۔