Wednesday, 26 April, 2006, 15:07 GMT 20:07 PST

ایرانی رہنما کا امریکہ کو انتباہ

ایران کے روحانی پیشوا آیت اللہ خامنئی نے امریکہ کو خبردار کیا ہے کہ اگر اس نےایران پر حملہ کیا تو دنیا بھر میں امریکی تنصیبات کو نقصان پہنچے گا۔

ایران ٹی وی کے مطابق آیت اللہ خامنئی نے کہا کہ ’ایرانی قوم کسی بھی حملے کا دوگنا شدت سے جواب دے گی۔‘

تہران میں مزدوروں کے عالمی دن کے موقع پر ہونے والی ایک تقریب میں آیت اللہ خامنئی نے کہا کہ ’ایران امریکی دھمکیوں کے سامنے نہیں جھکے گا۔ ایرانی قوم اور اس کے اہلکار امن چاہتے ہیں اور وہ کسی پر حملےہ نہیں کرنے والے۔‘

مغربی ممالک نے یہ خدشہ ظاہر کیا ہے کہ ایران کا جوہری پروگرام پُر امن نہیں ہے اور وہ جوہری ہتھیار تیار کرنا چاہتاہے۔ یہ موضوع سلامتی کونسل میں بھی اٹھایا گیا ہے ۔

سلامتی کونسل نے انتیس مارچ کو مطالبہ کیا تھا کہ ایران عالمی جوہری ادارے کے تمام شرائط مان کر یورینیئم کی آفزودگی روک دے۔

تاہم ایران کا موقف ہے کہ اس کے جوہری پروگرام کے مقاصد پُر امن ہیں اور وہ امریکہ اور مغربی ممالک کے جارحانہ رویے سے نہیں گھبراتا۔

بدھ کو ایرانی صدر محمود احمدی نژاد نے کہا تھا کہ ’ایران کے دشمن سلامتی کونسل اور عالمی جوہری ادارے کے ذریعے ایران کو سزا دینے میں نا کام ہو جائیں گے۔‘