Sunday, 16 April, 2006, 10:39 GMT 15:39 PST

چین ترقی کی رفتار سے پریشان

چین کے صدر ہُو جنتاؤ نے اپنے ملک کی اقتصادی ترقی کی تیز تر رفتار پر تشویس کا اظہار کیا ہے۔

انہوں نے کہا ہے کہ گزشتہ سال کے مقابلے میں اقصادی ترقی کی شرح 10 فیصد سالانہ رہی لیکن ترقی اتنی تیز تر رفتار حکومت کا ہدف نہیں تھی۔

انہوں نے مزید کہا کہ حکومت عام لوگوں کی زندگیوں کو بہتر بنانے پر زیادہ توجہ دینا چاہتی ہے۔

چینی صدر نے اس خدشے کا اظہار بھی کیا ہے کہ تیز تر اقتصادی ترقی ملک کے وسائل اور ماحولیات پر بھی اثر انداز ہو گی۔

تازہ ترین اعداد و شمار اس بات کا اظہار کرتے ہیں کہ چین میں اقتصادی ترقی کی تیز رفتاری میں کوئی کمی نہیں آئی۔

ہُو جنتاؤ نے کہا ہے کہ ’حکومت تیز تر اقتصادی ترقی نہیں چاہتی۔ ہمیں ترقی کی رفتار میں تیزی، معیار اور اس کے اثرات پر تشویش ہے‘۔

انہوں نے ان خیالات کا اظہار تائیوان میں حزبِ اختلاف کے سابق رہنما لئین چان سے ملاقات کے دوران کیا۔ ان کا کہنا تھا کہ ’ہم اپنے وسائل اور ماحول کو بچانے اور عام لوگوں کی زندگی کو بہتر بنانے کے بارے میں پُر تشویش ہیں‘۔