Friday, 14 April, 2006, 18:08 GMT 23:08 PST

’اسرائیل سب کے لیے خطرہ‘

ایران کے صدر احمدی نژاد نے کہا ہے کہ اسرائیل مشرق وسطیٰ کے لیے خطرہ ہے اور خاتمے کی طرف بڑھ رہا ہے۔

احمدی نژاد نے کہا کہ ’صیہونی حکومت‘ کا وجود کبھی نہ ختم ہونے والا بے لگام خطرہ ہے۔

ایران کے صدر نے کہا کہ اسرائیل ایک کھوکھلے درخت کی مانند ہے جو ایک ہی آندھی سے ختم ہو جائے گا۔

اسلامی دنیا سے اپیل
ایران کے روحانی پیشوا آیت اللہ علی خامنہ ای نے اسلامی ممالک سے اپیل کی ہے کہ وہ فلسطینی عوام اور حماس کی قیادت والی ان کی حکومت کی ہر ممکن مدد کریں۔

خامنہ ای نے تہران میں فلسطینیوں کے ساتھ یکجہتی کے اظہار کے لیے ہونے والی ایک بین الاقوامی کانفرنس سے خطاب کرتے ہوئے کہا مدد کرنا تمام مسلمانوں پر فرض تھا۔

فلسطینی حکومت کے نمائندے بھی کانفرنس میں شریک تھے۔ بی بی سی کے نامہ نگار نے بتایا کہ فلسطینی وزراء مالی امداد کی ٹھوس پیشکش کی امید کر رہے ہوں گے۔

فلسطینی انتظامیہ کے وزیر اعظم اسماعیل ہنیہ کہہ چکے ہیں کہ مغرب کی طرف سے امداد کی بندش ان کی انتظامیہ اور عوام کو کبھی شکست نہیں دے سکتی۔

غرب اردن اور غزہ میں ہزاروں فلسطینیوں نے اپنی حکومت کی حمایت میں مظاہرہ کیا ہے۔