Thursday, 16 March, 2006, 13:30 GMT 18:30 PST

افغانستان میں برڈ فلوکی تصدیق

افغانستان میں حکام کا کہنا ہے کہ وہاں پر پرندوں میں برڈ فلو کی مہلک قسم کی تصدیق ہوئی ہے۔

اقوام متحدہ اور افغانستان کی حکومت کی طرف سے جاری کیے گئے ایک مشترکہ بیان میں کہا گیا ہے کہ کابل اور جلال آباد میں چھ پرندوں میں برڈ فلو کے مہلک وائرس کی موجودگی کی تصدیق ہوئی ہے۔ افغانستان میں برڈ فلو کی موجودگی کا یہ پہلا واقعہ ہے۔

جلال آباد میں نو سو پولٹری فارم بند کر دیے گئے ہیں اور حکومت اور اقوام متحدہ نے متاثرہ علاقوں میں پرندوں کی تلفی کی منصوبہ بندی شروع کر دی ہے۔

کابل میں بی بی سی کے نامہ نگار بلال سروری نے کہا ہے کہ جلال آباد اور کنہڑ کے بازاروں سے مرغیاں غائب ہونا شروع ہو گئی ہیں لیکن ہرات اور مزار شریف سے مِل سکتی ہیں۔

حکام نے بتایا کہ ملک کے جنوبی صوبوں قندھار اور کندوز میں چھ پرندوں پر بھی تجزیے کیے گئے تھے لیکن وہ برڈ فلو کے وائرس سے پاک تھے۔

حکام نے کہا افغانستان میں یہ بیماری انسانوں تک نہیں پہنچی اور ضروری ہے کہ اس امکان کو روکا جائے۔

برڈ فلو کی جراثیم کی موجودگی کی تصدیق کے بعد افغانستان میں حکام نے پاکستان سے مرغی کو درآمد پر پابندی لگا دی ہے۔