Saturday, 11 March, 2006, 23:46 GMT 04:46 PST

بش کامشیر چوری کےالزام میں گرفتار

امریکی صدر جارج بش کے سابق سیاسی مشیر کلوڈا ایلن کو ایک سٹور سے پانچ ہزار ڈالر چوری کرنے کے الزام میں گرفتار کر لیا گیا ہے۔

امریکی صدر نے اپنے سابق مشیر کی چوری کے الزام میں گرفتاری پر اپنے رد عمل میں کہا کہ انہیں یہ سن کر سخت صدمہ پہنچا ہے۔

کلوڈا ایلن صدر بش کے داخلی سیاسی امور مشیر تھے لیکن کچھ عرصہ قبل اچانک اپنے عہدے سے مستفعی ہو گئے تھے۔

کلوڈا ایلن پر الزام ہے کہ انہوں نے ٹارگٹ ڈیپارٹمنٹل سٹور سے پچیس دفعہ چیزیں چورایاں جن کی کل مالیت پانچ ہزار ڈالر بنتی ہے۔

کلوڈا ایلن پر الزام ہے کہ انہوں نے کچھ ایسی چیزیں سٹور کو واپس کر دیں جو انہوں نے وہاں خریدی ہی نہیں تھیں۔

ریاست میری لینڈ کی پولیس نے تحقیات کے بعد کلوڈا ایلن کو منٹگمری کونٹی سے گرفتار کر لیا ہے۔

ٹارگٹ سٹور کے ایک ملازم نے پولیس کو بتایا ہے کہ اس نے کلوڈا ایلن کو سٹور کے ایک خالی بیگ میں کچھ چیزیں ڈالتے ہو دیکھا اور بعد میں انہوں نے اس کاونٹر سے رجوع کیا جہاں سٹور سے خریدی ہوئی چیزیں واپس کی جاتی ہیں۔

کلوڈا ایلن نے کاونٹر کو ایک رسید دکھائی اور چیزیں واپس کر کے پانچ ہزار ڈالر لےکر وہاں سے چلے گئے۔

وائٹ ہاؤس کے ایک ترجمان نے بتایا کہ کلوڈا ایلن نے اپنے ایک ساتھی کو بتایا ہے کہ ان پر چوری کا الزام غلط فہمی کا نتیجہ ہے اور وہ جلد اپنی بے گناہی ثابت کرنے میں کامیاب ہو جائیں گے۔