Thursday, 16 February, 2006, 21:03 GMT 02:03 PST

طالبان کی فہرست پاکستان کےحوالے

افغانستان نے ان ڈیڑھ سو طالبان جنگجوؤں کی ایک فہرست پاکستان کے حوالے کی ہے جو اسے اپنے سکیورٹی دستوں اور بین الاقوامی اتحادی فوج پر سرحد پار سے حملوں کے سلسلے میں مطلوب ہیں۔

افغان حکام کا خیال ہے کہ یہ طالبان جنگجو پاکستان کے قبائلی علاقے میں چھپے ہوئے ہیں۔

اگرچہ یہ معلوم نہیں ہو سکا کہ اس فہرست میں کن کن طالبان جنگجوؤں کے نام شامل ہیں، تاہم افغانستان کے وزیر دفاع جنرل عبدالرحیم وردگ نے بی بی سی کو بتایا کہ انہیں امید ہے کہ پاکستان اس کا مثبت جواب دے گا۔

افغان صدر حامد کرزئی کے ایک ترجمان نے بتایا ہے کہ فہرست میں دیئے گئے طالبان جنگجوؤں میں سے کئی کے نام بھی دیئے گئے ہیں۔

افغانستان نے پاکستان کو کہا ہے کہ وہ فہرست میں دیئے گئے طالبان جنگجوؤں کو حراست میں لے۔

افغان صدر حامد کرزئی آج کل پاکستان کے دورے پر ہیں اور ملک کی قیادت پر زور دے رہے ہیں کہ وہ طالبان اور ان کے مقامی حامیوں کے خلاف کارروائی کریں۔

گزشتہ سال افغانستان میں 2001 میں طالبان کے اقتدار کے خاتمے کے بعد سے خود کش حملوں اور بمباری کے نتیجے میں سب سے زیادہ ہلاکتیں ہوئی ہیں۔

جمعرات کے روز پاکستان کے نیشنل ڈیفنس کالج میں اپنے خطاب میں صدر حامد کرزئی نے مذہبی انتہاپسندی کی روک تھام کے لیے وسیع تر تعاون کی ضرورت پر زور دیا جو، ان کے خیال میں، خطے کے استحکام کے لیے ایک خطرہ ہے۔