Saturday, 11 February, 2006, 00:26 GMT 05:26 PST

فرانسیسی اخباروں پر عدالتی کارروائی

فرانس میں مسلمانوں کی سب سے بڑی تنظیم نے ان فرانسیسی اخباروں کے خلاف قانونی کارروائی کرنے کا فیصلہ کیا ہے جنہوں نے پیغراسلام کے بارے میں توہین آمیز کارٹون شائع کیے۔

سی ایف سی ایم یعنی فرینچ کونسل آف مسلم فیتھ نامی اس تنظیم کا کہنا ہے کہ اس نے ان اخباروں کے خلاف مقدمہ دائر کرنے کا فیصلہ وکیلوں سے مشورہ کرنے کے بعد کیا ہے۔

تنظیم کے وکیل میتخ حفیظ نے بتایا کہ اس معاملے سے متعلق تفصیلات اکٹھا کی جارہی ہیں تاہم انہوں نے یہ واضح نہیں کیا کہ کن قانونی نکات پر عدالتی چارہ جوئی کی جائی گی۔

پانچ فرانسیسی اخباروں نے یہ کارٹون شائع کیے ہیں جن کی وجہ سے مسلم ممالک میں بڑے پیمانے پر پرتشدد مظاہرے ہونا شروع ہوئے تھے۔ فرانسیسی صدر ژاک شیراک نے کارٹونوں کو پھر سے شائع کرنے کے فیصلے کو ’واضح طور پربھڑکانے‘ کی ایک کوشش بتایا ہے۔

اس طرح کے بارہ کاروٹن سب سے پہلے ڈنمارک کے ایک اخبار میں شائع ہوئے تھے۔

سی ایف سی ایم نے ایک بیان میں کہا ہے کہ اس نے فرانسیسی اخباروں کے خلاف عدالتی کارروائی کا فیصلہ اپنے اراکین اور وکیلوں کی ایک میٹنگ کے بعد کیا ہے۔

یہ تنظیم فرانس کے لگ بھگ پانچ ملین مسلمانوں کی نمائندگی کرتی ہے لیکن چونکہ یہ صرف تین سال ہی وجود میں رہی ہے اس لیے خود ہی عدالتی کارروائی شروع نہیں کرسکتی۔ امید کی جارہی ہے کہ اس کے ماتحت کوئی رکن تنظیم جو فرانس میں پانچ سال سے زائد وجود میں رہی ہے یہ قانونی کارروائی شروع کرے گی۔

یہ واضح نہیں ہے کہ اس عدالتی کارروائی کا کتنے اخباروں کو سامنا رہے گا لیکن شارلی ہیبدو نامی ایک ہفتہ وار کا نام سامنے آیا ہے۔ دیگر اخباروں میں جنہوں نے یہ کارٹون شائع کیے تھے فرانس سواغ، لِبریشیوں، لفیگارو اور لپیریسین شامل ہیں۔

دریں اثناء ڈنمارک کے جس اخبار نے توہین آمیز کارٹونوں کی اشاعت کی تھی اس کے مدیر کو اخبارکی انتظامیہ کی طرف سے چھٹیوں پر بھیج دیا گیا ہے۔

ڈنمارک کے اخبارا یالند پوستن کے کلچرایڈیٹر فلیمنگ روز کو ان کے اس اعلان کے بعد کہ وہ ایران کی طرف سے یورپ میں یہودیوں کی نسل کشی کے کارٹون بھی چھاپ دیں گے اخبار کی انتظامیہ کی طرف سے چھٹیوں پر جانے کا حکم ملا۔