Friday, 27 January, 2006, 21:26 GMT 02:26 PST

انڈونیشیا میں شدید زلزلہ

انڈونیشیا کے مشرقی ساحل پر بندا سمندر میں شدید زلزلہ آیا ہے۔

امریکہ میں ارضیاتی سروے کے محکمہ کے مطابق زلزلہ سنیچر کی صبح مقامی وقت کے مطابق ایک بج کر اٹھاون منٹ پر آیا۔ فوری طور پر کسی جانی یا مالی نقصان کی اطلاع نہیں۔

دسمبر 2004 میں انڈونیشیا کے ساحل میں آنے والے زلزلے سے پیدا ہونے والے سونامی کے نتیجے میں لاکھوں لوگ جان بحق ہوئے تھے۔

بحرالکاہل میں سونامی کی اطلاع دینے والے مرکز کے مطابق زلزلے سے فوری طور پر سونامی پیدا ہونے کا خطرہ نہیں ہے۔

زلزلے کا مرکز امبون شہر سے ایک سو پچانوے کلومیٹر دور سطح سمندر سے تین سو بیالیس کلومیٹر نیچے تھا۔

دو منٹ جای رہنے والے اس زلزلے کے دوران امبون میں لوگ گھبراہٹ میں اپنے گھر بار چھوڑ گئے۔

انڈونیشیا ایک ایسے خطے میں واقع ہے جہاں زلزلہ آنے کا مستقل خطرہ رہتا ہے۔

سن دو ہزار چار میں آنے والی سونامی کے نتیجے میں انڈونیشیا کے صوبے بندہ آچے میں ایک لاکھ تیس ہزار افراد جاں بحق ہوئے تھے۔