Wednesday, 18 January, 2006, 02:47 GMT 07:47 PST

تیل کی قیمتوں میں تیزی کا رججان

ایران کے ایٹمی پروگرام کی دوبارہ شروعات اور نائجیریا میں تیل کپمنی کے چار ملازمین کے اغوا کی وجہ سے عالمی منڈی تیل کی قیمتوں میں اضافہ ہوگیا ہے۔

امریکہ میں میں ایک بیرل خام تیل کی قیمت ساٹھ ڈالر سے تجاوز کر گئی ہے جو ستمبر سن 2005 کے بعد سب سے زیادہ ہے۔

بی بی سی کے معاشی نامہ نگار کے مطابق نائیجریا میں شیل کپمنی کے چار ملازمین کو اغوا کیے جانے اور ایران کے جوہری پروگرام کو دوبارہ شروع کرنے پر عالمی تشویش کی وجہ سے تیل کی قیمتوں پر اثر پڑا ہے۔

ایران کا شمار دنیا میں تیل پیدا کرنے ملکوں میں چوتھے نمبر پر آتا ہے اور اگر ایران پر تجارتی پابندیاں عائد کر دی گئیں تو عالمی میں منڈی تیل کی قیمتوں میں مزید اضافہ بھی ہو سکتا ہے۔

ادھر ایران نے دھمکی دے رکھی ہے کہ اگر اس کے جوہری پروگرام کو سلامتی کونسل کے حوالے کیا گیا تو اس سے تیل کی قیمتوں پر اثر پڑے گا جس کا نقصان عالمی معیشت کو بھی گا۔