Friday, 06 January, 2006, 23:10 GMT 04:10 PST

بش عراق میں ہار مان لیں: الظواہري

اسامہ بن لادن کے نائب اور القاعدہ نیٹ ورک کے سیکنڈ ان کمانڈ ايمن الظواہري نے کہا ہے کہ امریکہ کا عراق سے فوجیں واپس بلانے کا کوئی بھی منصوبہ دراصل اسلام کی فتح ہے۔

عربی ٹی وی چینل الجزیرہ پر نشر کیے جانے والے ایک بیان میں ايمن الظواہري نے کہا کہ امریکی صدر کو عراق میں اپنی شکست کو تسلیم کر لینا چاہیئے۔

امریکی صدر بش نے حال ہی میں کہا تھا کہ ان کا منصوبہ ہے کہ سکیورٹی کا کنٹرول عراقی انتظامیہ کے حوالے کر دیا جائے۔ تاہم انہوں نے عراق سے امریکی فوجیوں کے واپس جانے کے کسی شیڈول کا اعلان نہیں کیا۔

الظواہری کا یہ بیان ایک ویڈیو ٹیپ میں الجزیرہ کے پاس پہنچا تھا۔

ویڈیو میں الظواہري ایک پردے کے سامنے بیٹھے ہوئے دکھائےگئے ہیں اور اس طرح یہ اندازہ لگانا ناممکن ہے کہ انہوں نے یہ بیان کہاں پر ریکارڈ کروایا ہے۔

الجزیرہ کا کہنا ہے کہ یہ ٹیپ انہیں دسمبر میں ملا تھا۔

بی بی سی کے سکیورٹی کے نامہ نگار کا کہنا ہے کہ یہ پیغام ايمن الظواہري کے تازہ ترین پیغامات کا ایک حصہ ہے۔ گزشتہ ایک سال سے القاعدہ کے رہنما اسامہ بن لادن کی طرف سے کوئی پیغام نشر نہیں کیا گیا ہے۔