Tuesday, 29 November, 2005, 23:15 GMT 04:15 PST

صدام حسین کے یونیفام کی نیلامی

ایک امریکی ویب سائٹ پر ایک ایسی فوجی وردی فروخت کے لیے پیش کی گئی ہے جس کے بارے میں کہا جاتا ہے کہ وہ عراق کے معزول صدر صدام حسین کی ہے۔

یہ فوجی وردی سبزی مائل ہے جس پر فوج کی مخصوص آرائشی جھالر یا پٹیاں بھی لگی ہوئی ہیں اور جن سے عراقی فوج میں صدام حسین کے رتبے کا پتہ ملتا ہے۔ ویب سائٹ پر اس وردی کی ابتدائی قیمت پانچ ہزار ڈالر مقرر کی گئی ہے۔

ویب سائٹ کے مطابق سابق عراقی صدر کی یہ وردی ایک امریکی فوجی کو سن دو ہزار تین میں بغداد کے ہوائی اڈے پر اتحادی فوج کے حملے کے دوران ملی تھی۔

آج کل صدام حسین عراق میں امریکی تحویل میں ہیں اور ان پر انسانیت کے خلاف جرائم کے الزام پر مقدمہ چل رہا ہے۔

صدام حسین نے اپنے چوبیس سالہ دورِ اقتدار میں کئی طرح کے لباس اکٹھے کیے۔ کبھی وہ عرب شیخ کے روپ میں نمودار ہوتے تھے تو کبھی دورِ حاضر کی وہ ٹوپی اور سوٹ پہن کر لوگوں کے سامنے آتے تھے جو یورپ میں کاروبای افراد پہنتے ہیں۔

لیکن زیتون کے رنگ کا یونیفارم شاید واحد ایسا لباس ہے جس کے ساتھ معزول صدر صدام حسین کو اکثر منسوب کیا گیا ہے۔ وہ جب بھی غیر ملکی وزارئے اعظم یا صدور سے ملاقات کرتے یا ٹیلی وژن پر مختلف اجلاسوں کی صدرات کرتے نظر آتے، فوجی وردی پہنے ہوتے تھے۔

امریکی ویب سائٹ کا کہنا ہے کہ اسے امید ہے کہ عراقی رہنما کی وردی ابتدائی قیمت سے زیادہ پر فروخت ہوگی۔

نیلامی کرنے والی یہ ویب سائٹ کہتی ہے کہ صدام حسین کا ایک اور یونیفارم حال ہی میں اسی ویب سائٹ پر بیس ہزار ڈالر میں فروخت ہوا ہے۔

امریکی فوجیوں کو یہ حکم ہے کہ وہ تحائف یا انسانی ہنر اور صناعی کے نمونے عراق سے باہر نہ لے کر جائیں۔ البتہ ایک امریکی فوجی ترجمان نے خبر رساں ادارے رائٹرز کو بتایا ہے کہ غیر معمولی حالات میں یااستثنیات کے تحت ایسا کیا بھی جا سکتا ہے۔