Sunday, 24 July, 2005, 20:20 GMT 01:20 PST

لندن حملے: مشتبہ گرفتار تین ہوگئے

لندن بم حملوں کی تفتیش کے سلسلے میں پولیس نے لندن سے ایک اور ملزم کو گرفتار کیا ہے اور اس گرفتاری کے بعد جمعرات کے ناکام حملوں کے سلسلے میں گرفتار ہونے والے مشتبہ افراد کی تعداد تین ہوگئی ہے۔

اس دوران پولیس کو پہلے سے گرفتار دو افراد سے تفتیش کے لیے مزید وقت دیا گیا ہے۔ اب انہیں پولیس بدھ تک حراست میں رکھ سکتی ہے۔

پولیس گزشتہ جمعرات اور 7 جولائی کو ہونے دھماکوں کے درمیان کسی تعلق کے بارے میں تفتیش کر رہی ہے۔

7 جولائی کے حملوں کے مبینہ ملزمان میں اکثر کا تعلق پاکستان سے آ کر لندن میں آباد ہونے والے خاندانوں سے تھا جب کے جمعرات کے ناکام حملوں کے مبینہ ملزمان مشرقی افریقی نژاد بتائے جاتے ہیں۔

ان مشتبہ افراد میں سے پہلے ملزم کو اتوار کو جنوبی لندن سے گرفتار کیا گیا تھا۔

جنوبی لندن میں گرفتاری پولیس کے مطابق خفیہ کیمروں کی ریکارڈنگ سے حاصل کی جانے والے تصاویر کے جاری کیے جانے کے کچھ ہی دیر بعدعمل میں آئی تھی۔

یہ تصاویر لندن کے جنوبی علاقے سٹاک ویل میں پولیس کے ہاتھوں ایک شخص کو ٹیوب سٹیشن پر گولیاں مار کر ہلاک کیے جانے کے بعد جاری کی گئی تھیں۔

پولیس نے یہ نہیں بتایا گیا کہ جن لوگوں کو گرفتار کیا گیا ہے وہ ان چار افراد میں سے ہیں یا کسی اور شبہ میں گرفتار کیے گئے ہیں۔