Thursday, 23 June, 2005, 09:38 GMT 14:38 PST

جہادیوں کی نئی نسل کا خطرہ

عراق میں جاری مزاحمت پر سی آئی اے کی رپورٹ کے مطابق یہ مزاحمت اسلامی جہادیوں کی ایک نئی نسل کو جنم دے رہی ہے جو دوسرے ممالک میں بھی عدم استحکام پھیلا سکتی ہے۔

اس اہم رپورٹ میں ایجسنی نے کہا ہے عراق کے حالات افغانستان کے مقابلے میں بہت زیادہ خراب ہیں جہاں اسامہ بن لادن کی تنظیم القاعدہ کو فروغ ملا تھا۔

رپورٹ کے مطابق عراقی اور غیر ملکی مزاحمت کار لڑائی کے خطرناک ہنر حاصل کر رہے ہیں جو عراق کے شہروں میں ہونے والی لڑائی کے لیے موزوں ہیں۔ جیسے کار بم حملے اور پولیس اور فوجی ٹھکانوں کو نشانہ بناناوغیرہ۔

رپورٹ میں خدشات ظاہر کیا گیا ہے کہ جب عراق میں حالات معمول پر آئیں گے تو ان جہادیوں کے منتشر ہونے کے بعد بین الاقوامی سطح پر شدت پسندی کا خطرہ بڑھ جائے گا۔

نیویارک ٹائمز میں شائع ہونے والی اس رپورٹ کی تصدیق سی آئی اے کے ایک افسر نے کی ہے تاہم انہوں نے اپنا نام ظاہر نہیں کیا۔