Tuesday, 21 June, 2005, 07:57 GMT 12:57 PST

شام مخالف سیاست دان ہلاک

لبنان کے ایک شام مخالف سیاستدان جارج حاوی کار بم دھماکے میں ہلاک ہو گئے ہیں۔

لبنان کے دار الحکومت بیروت میں پولیس نے بتایا ہے کہ کمیونسٹ پارٹی کے سابق رہما جارج حاوی کی گاڑی دھماکے میں تباہ ہو گئی۔

یہ دھماکہ مقامی وقت کے مطابق دس بجے صبح کے قریب ہوا۔

اطلاعات کے مطابق بم گاڑی کی آگے والی پسینجر سیٹ کے نیچے نصب تھا۔
مسٹر حاوی فوراً ہلاک ہو گئے لیکن ان کا ڈرائیور زخمی ہوا۔ دھماکے کے بعد بھی گاڑی رکی نہیں اور اور عینی شاہدین نے بتایا ہے کہ ڈرائیور کو چلتی گاڑی میں سے کودنا پڑا۔

پولیس کےعلاقے کا گھراؤ کرنے کی کوششوں کے باوجود لوگوں کی بڑی تعداد موقع پر جمع ہوگئی۔

لبنان کے وزیر اعظم نجیب مِکاتی نے اس قتل پر صدمے کا اظہار کرتے ہوئے کہا کہ لبنان کی ہر نئی کامیابی کے بعد ملک دشمن عناصر سکیورٹی کو نشانہ بنا کر اس طرح کا ایک سگنل بھیجتے ہیں۔

مقتو جارج حاوی لبنان میں اس ماہ قتل ہونے والے دوسرے شام مخالف شخصیت ہیں۔
دو جون کو صحافی ثمیر قاصر بھی ایک کار بم دھماکے میں ہلاک ہوئے تھے۔

جارج حاوی کی ہلاکت ملک کے عام انتخابات میں شام مخالف اتحاد کی فتح کے ایک روز بعد ہوئی ہے۔ کچھ ماہ پہلے شام نے لبنان سے اپنی افواج کو انتیس سال کے بعد واپس بلایا تھا۔