Monday, 20 December, 2004, 17:32 GMT 22:32 PST

دفاعی بجٹ میں اضافہ کریں گے: بش

صدر جارج بش نے سال کے اختتام پر پریس کانفرنس سے خطاب میں یقین دلایا کہ آئندہ بجٹ میں امریکی فوج کی ضروریات کو پورا کرنے کے لیے فنڈ فراہم کئے جائیں گے اور امریکی خفیہ اداروں کو مضبوط کرنے کے لیے تمام ممکنہ اقدامات کئے جائیں گے۔

اس پریس کانفرنس میں عراق کا ذکر کرتے ہوئے جارج بش نے کہا کہ عراق میں تیس جنوری کو ہونے والے انتخابات عراق کی آزادی کی طرف سفر کا آغاز ہے۔

انہوں نے کہا کہ عراق میں ’دہشت گرد‘ جمہوری عمل کو درہم برہم کرنے کی کوشش کریں گے۔ انہوں نے کہا کہ انہیں یقین ہے کہ دہشت گرد اپنے مذموم مقاصد میں کامیابی حاصل نہیں کر سکیں گے۔

صدر بش نے روس کے ساتھ امریکہ کے تعلقات کو مزید مستحکم بنانے کی خواہش کا اظہار بھی کیا۔ انہوں نے کہا کہ وہ روسی صدر ولادیمیر پوتن سے فروری میں سلواکیہ میں ملاقات کرنے والے ہیں۔