Sunday, 24 October, 2004, 12:47 GMT 17:47 PST

حامد کرزئی جیت گئے

کابل سے موصولہ اطلاعات کے مطابق حامد کرزئی افغانستان میں ہونے والے انتخابات کے دوران دیئے گئے ووٹوں کی کُل تعداد کے نصف حصے سے زائد ووٹ حاصل کر کے کامیاب ہو گئے ہیں۔

تاہم ماہرین کا ایک پینل انتخابات میں ہونے والی بدنظمیوں کی چھان بین ایک ہفتے میں مکمل کر لے گا جس کے بعد انتخابات کے حتمی نتائج کا سرکاری اعلان کیا جائے گا۔

حامد کرزئی کے حامیوں کا کہنا ہے کہ افغانستان میں ہونے والے پہلے جمہوری صدارتی انتخابات میں حامد کرزئی کو واضح کامیابی حاصل ہوئی ہے۔

نوے فیصد ووٹوں کی گنتی سے حاصل ہونے والے ابتدائی نتائج کے مطابق حامد کرزئی کو تقریباً پچپن فیصد ووٹ حاصل ہوئے ہیں جو دو ہفتے قبل ہونے والے الیکشن میں دیئے گئے ووٹوں کی مجموعی تعداد کے نصف سے زائد ووٹ ہیں۔

حامد کرزئی کے اہم مدِمقابل اور سابق وزیر تعلیم یونس قانونی کو سترہ فیصد ووٹ ملے اور انہوں نے حامد کرزئی کی جیت کو تسلیم کر لیا ہے۔

الیکشن کمیشن کی طرف سے اس ماہ کے آخر میں ایک باضابطہ بیان کی توقع ہے کیونکہ اس وقت تمام ووٹوں کی گنتی مکمل ہو جائے گی اور اقوام متحدہ کا مقرر کردہ تین رکنی پینل انتخابات میں بدنظمیوں کی چھان بین مکمل کر لے گا۔