Friday, 17 September, 2004, 02:38 GMT 07:38 PST

آئیون نے تباہی مچا دی، 12 ہلاک

آئیون نامی سمندری طوفان جس نے امریکہ کے جنوب مشرقی ساحل کو اپنی زد میں لیا ہوا تھا اب دیگر علاقوں تک پہنچ گیا ہے اور سخت سیلاب کا خطرہ پیدا ہوگیا ہے۔ اب تک طوفان سے بارہ افراد ہلاک ہوچکے ہیں۔

موسم کے ماہرین نے خبردار کیا ہے کہ اگرچہ طوفان کی شدت میں کسی حد تک کمی آئی ہے لیکن یہ بھی چالیس سنٹی میٹر تک بارش کا سبب بن سکتا ہے۔

صدر جارج بش نے الباما، لوئی سیانا اور مسی سپی کو آفت والے علاقے قرار دے دیا ہے۔

لاکھوں لوگ بجلی سے محروم ہوگئے ہیں۔ کئی پلوں کے بارے میں اطلاع ملی ہے کہ وہ پانی میں بہہ گئے ہیں اور جائیداد کو سخت نقصان پہنچا ہے۔

بتایا گیا ہے کہ فلوریڈا سے لوئسیانا کے پانچ سو نوے کلومیٹر تک کا علاقہ طوفان کی زد میں ہے۔

کیریبین میں اس طوفان سے ساٹھ افراد مارے گئے تھے۔

اس سمندری طوفان کے ساتھ ایک سو پینتیس میل فی گھنٹہ کی رفتار سے آندھیاں چل رہی ہیں۔