Sunday, 05 September, 2004, 07:42 GMT 12:42 PST

’حِزب اللہ ختم نہیں ہو گی‘

لبنانی شدت پسند تنظیم حزب اللہ کے رہنما شیخ حسن نصراللہ نے سلامتی کونسل کی طرف سے حزب اللہ کو ختم کرنے کی قرارداد مسترد کر دی ہے۔

شیخ حسن نصراللہ نے کہا ہے کہ سلامتی کونسل کی تجویز ’اسرائیل کی چال ہے‘۔

انہوں نے کہا کہ حزب اللہ کے خاتمے سے لبنان کمزور ہو جائے گا۔

شیخ حسن نصراللہ نے لبنان میں شام کی فوجوں کی موجودگی کا دفاع کرتے ہوئے کہا کہ خانہ جنگی کے خاتمے کے بعد شام کی فوج کی موجودگی سے ملک میں سلامتی کی صورتحال بہتر کرنے میں مدد ملی ہے۔

جنوبی بیروت میں حزب اللہ کے اجتماع سے خطاب کرتے ہوئے شیخ حسن نصراللہ کہا کہ ’ہم موجودہ صورتحال میں شام کی فوجوں کی واپسی نہیں چاہتے‘۔

اس سے قبل سلامتی کونسل نے تمام غیر ملکی فوجوں کو لبنان سے چلے جانے اور جنگجو تنظیموں کو غیر مسلحہ ہونے کے لیے کہا تھا۔

سلامتی کونسل نے غیر ملکی طاقتوں کو لبنان کی خود مختاری کا احترام کرنے کے لیے بھی کہا۔

حزب اللہ نے جنوبی لبنان میں اسرائیلی قبضے کے خلاف اٹھارہ سال گوریلا جنگ لڑی جو سن دو ہزار میں اسرائیلی فوجوں کی واپسی پر ختم ہوئی۔