Sunday, 05 September, 2004, 06:58 GMT 11:58 PST

فرانسیس کی آمد فلوریڈا میں کرفیو

امریکی کی جنوب مشرقی ریاست فلوریڈا میں سمندری طوفان
فرانسیس کی آمد کے باعث مقامی حکام نےاطلاعات کے مطابق صبح سے شام تک کا کرفیو نافذ کر دیا ہے اور تقریباً بیس لاکھ گھروں کو بجلی کی ترسیل منقطع ہو گئی ہے۔

فلوریڈا کے مشرقی ساحل سے فرانسیس نامی طوفان کے ٹکرانے سے شدید بارشیں اور تیز ہوائیں چل رہی ہیں جن کی وجہ سے بہت سی عمارتوں کو نقصان پہنچا ہے اور مواصلات کا نظام درم برہم ہو گیا ہے۔

گزشتہ روز ساحلی علاقوں میں رہنے والے پچیس لاکھ افراد کو محفوظ مقامات پر منتقل ہونے کی ہدایت کی گئی تھی۔ خیال کیا جاتا کہ ایک ماہ کے اندر اس علاقے میں آنے والے دوسرے بڑے طوفان کے باعث یہ لوگ محفوظ مقامات پر منتقل ہو چکے ہیں۔

فلوریڈا کی تاریخ میں اتنی بڑی تعداد میں لوگوں کو نقل مکانی کرنے کی ہدایت اس سے پہلے کبھی نہیں دی گئی۔

اگست میں اسی علاقے میں چارلی نامی طوفان سے چھبیس افراد ہلاک اور اربوں ڈالر مالیات کی املاک کو نقصان پہنچا تھا۔

اس وقت طوفان کا مرکز فورٹ پیئرس میں ہے لیکن بی بی سی کے نامہ نگار ڈینیل لیک نے اطلاع دی ہے کہ میامی سے لے کر جیکسن وائیل تک کا علاقے طوفان کی زد میں ہے۔

فرانسیس ایک بہت بڑا طوفان ہے جس کا قطر چار سو میل تک پھیلا ہوا ہے۔