Friday, 18 June, 2004, 00:46 GMT 05:46 PST

تفتیش کار پر فرد جرم عائد

امریکی خفیہ ادارے سی آئی اے کے لئے افغان قیدیوں سے تفتیش کرنے والے ایک امریکی کنٹریکٹر پر افغان قیدیوں سے تشدد کرنے کے الزام میں فرد جرم عائد کر دی گئی ہے۔

مذکورہ شخص پر ایک قیدی کو ہلاک کرنے کی فرد جرم امریکہ میں ایک جیوری نے عائد کی ہے۔

شمالی کیرولائنا میں ایک جج نے کنٹریکٹر ڈیوڈ پسیرو جو الزامات عائد کیے ہیں ان میں ایک افغان قیدی عبدالولی پر چار مرتبہ وار کرنے اور ایک بار خطرناک آلے کے ساتھ جان لیوا حملہ شامل ہے۔

مسٹر ولی گزشتہ برس کنڑ میں قائم ایک امریکی اڈے میں تفتیش کے دور روز بعد انتقال کر گئے تھے۔

نامہ نگاروں کا کہنا ہے کہ امریکی قید میں تین افغانوں کی ہلاکت کی اب تک تصدیق ہوئی ہے اور عبدالولی ان میں سے ایک تھے۔

حقوق انسانی کے لیے کام کرنے والی تنظیموں کا کہنا ہے کہ عراقی اور افغان قیدیوں سے امریکی بدسلوکی ایک معمول ہے۔

جبکہ امریکی صدر بش کا کہنا ہے کہ عراق کی ابوغریب جیل میں قیدیوں کے ساتھ کیا جانے والا ٹارچر اپنی نوعیت کا ایک ہی واقعہ ہے۔