Tuesday, 15 June, 2004, 03:17 GMT 08:17 PST

’قبروں کی بے حرمتی پر سزا ہوگی‘

فرانس کے صدر ژاک شیراک نے کہا ہے کہ ان نیو نازیوں کا پتہ لگا کر انہیں سزا دی جائے گی جنہوں نے اسٹراسبرگ کے ایک قبرستان میں مسلمانوں کی تقریباً پچاس قبروں کی بے حرمتی کی ہے۔

پیر کے روز ان قبروں پر نسل پرست نعرے لکھے پائے گئے اور نازیوں کے سواستک نشان بنے ہوئے تھے۔

اس کے علاوہ ایک علاقائی اسلامی رہنما کو مارنے کی دھمکی بھی درج تھی۔

ایک بیان میں صدر نے کہا کہ نفرت اور ظلم کے ایسے کام فرانسیسی اقدار کے منافی ہیں۔

مسلم قبروں کی بے حرمتی کا یہ واقعہ فرانس میں نسل پرست سرگرمیوں میں اضافے کی سمت ایک اور اشارہ ہے۔

فرانس کے وزیر داخلہ نے اسٹراس برگ میں مسلم رہنماؤں سے ملاقات کی جہاں انہوں نے مختلف عقائد کے ماننے والوں کے مابین ہم آہنگی بڑھانے کے لئے ایک کمیٹی بنانے کا بھی اعلان کیا۔