Friday, 11 June, 2004, 03:23 GMT 08:23 PST

صدر قذافی کیخلاف قتل کی تحقیقات

صدر بش نے کہا ہے کہ امریکہ لیبیا کے خلاف سعودی ولیعہد کے قتل کی سازش کرنے کی تحقیقات کر رہا ہے۔

کہا جاتا ہے کہ لیبیا نے گزشتہ سال سعودی ولیعہد شہزادہ عبداللہ کو قتل کرنے کی سازش کی تھی اور اس سازش میں لیبیا کےصدر معمر قذافی بھی ملوث تھے۔

لیبیا نے ان الزامات کو ایک ایسا جھوٹ قرار دیا جس کا مقصد بیرونی دنیا میں لیبیا کے تشخص مجروح کرنا ہے۔

اس سازش کا انکشاف امریکی اخبارات نے کیا ہے اور ان کا کہنا ہے کہ صدر معمر قذافی نے قتل کے اس منصوبے کے منظوری دی تھی۔

امریکی دفتر خارجہ کے ایک ترجمان کا کہنا ہے کہ اگر لیبیا کے خلاف یہ الزام درست ثابت ہوا تو اس سے مفاہمت کے اقدامات کو نقصان پہنچ سکتا ہے۔

ترجمان رچرڈ باؤچر کا کہنا ہے کہ اسی الزام کی وجہ سے لیبیا کا نام اب تک ان ملکوں کی فہرست میں شامل ہے جو دہشت گردی کی سرپرستی کرتے ہیں۔

امریکی حکام کا کہنا ہے کہ لیبیا کے حکام سے اس معاملے پر بات ہو چکی ہے اور انہوں نے یقین دلایا ہے کہ سیاسی اختلافات ختم کرنے کے لیے تشدد کے استعمال کی حمایت نہیں کی جائے گی۔

سعودی ولیعہد شہزادہ عبداللہ

صدر بش نے صحافیوں کو بتایا ہے کہ تحقیقات جاری ہیں اور اگر اس کے کچھ ثبوت مل گئے تو ان کے مطابق کارروائی کی جائے گی۔

بتایا جاتا ہے کہ یہ انکشاف گزشتہ سال زیرحراست رہنے والے ایک امریکی مسلمان نے عائد کئے تھے۔