Thursday, 03 June, 2004, 15:38 GMT 20:38 PST

سی آئی اے کے سربراہ مستعفی

امریکہ کے صدر جارج بش نے اعلان کیا ہے کہ خفیہ ادارے سی آئی اے کے سربراہ جارج ٹینٹ نے چند ذاتی وجوہات کی بنا پر اپنے عہدے سے استعفیٰ دے دیا ہے۔

جارج ٹینٹ گزشتہ سات سالوں سے امریکی خفیہ ادارے کی سربراہی کر رہے تھے۔

وہ جولائی کے وسط تک تمام اختیارات اپنے نائب جان میکلولن کے حوالے کر دیں گے جو نئے ڈائریکٹر کی تقرری تک ادارے کے سربراہ کے فرائض ادا کریں گے۔

صدر بش نے کہا کہ انہیں افسوس ہے کہ جارج ٹینٹ جا رہے ہیں۔ انہوں نے کہا کہ دہشت گردی کے خلاف جنگ میں ٹینٹ ایک مضبوط اور قابل سربراہ ثابت ہوئے ہیں۔

سی آئی اے کے ڈائریکٹر پر امریکہ میں عراق کی جنگ سے پہلے غلط معلومات مہیا کرنے اور القاعدہ کے خطرے سے نمٹنے کے حوالے سے کافی تنقید ہو رہی تھی۔

اطلاعات کے مطابق انہوں نے صدر بش کو بتایا تھا کہ عراق کے وسیع پیمانے پر تباہی پھیلانے والے ہتھیاروں کے مہونے کے بارے میں ان کے پاس ٹھوس ثبوت ہیں۔