Wednesday, 12 May, 2004, 20:54 GMT 01:54 PST

نئی تصاویر:خواتین سے بھی تشدد

امریکہ میں کانگریس کے ارکان کو عراق میں قیدیوں سے بدسلوکی کی مزید تصاویر اور ویڈیو فلمیں دکھائی گئی ہیں جن میں خواتین قیدیوں کے ساتھ تشدد کے واقعات کے اندوہناک مناظر بھی شامل تھے۔

امریکی سینیٹروں کے مطابق یہ تصاویر زیادہ سنگین اور پریشان کن ہیں جن میں خواتین قیدیوں کو برہنہ کر کے ان کے ساتھ تشدد کے مناظر بھی شامل ہیں۔

امریکی کانگریس کے ممبران کو یہ تصاویر اور ویڈیو فلم دکھانے کا اہتمام امریکی محکمہ دفاع پینٹاگن نے کیا تھا۔

ایک سینیٹر نے کہا یہ تصویر ان کی توقع سے زیادہ بدترین ہیں۔ ایک اور رکن کانگریس نے کہا کہ اس بات کا یقین کرنا مشکل ہے کہ یہ سب کچھ ایک امریکی فوجی اڈے پر کیا گیا۔

ایک رکن نے کہا کہ وہ یہ سمجھنے سے قاصر ہیں کہ ایسے لوگوں کو امریکی فوج میں کس طرح بھرتی کیا گیا۔

امریکی فوجی حکام اب تک نو فوجیوں کا قیدیوں سے بدسلوکی کے الزامات میں کورٹ مارشل کرنے کا اعلان کر چکے ہیں۔

ایک خاتون فوجی نے جو ان واقعات میں ملوث ہے بیان دیا ہے کہ قیدیوں کے ساتھ تشدد کرنے کے احکامات انہیں حکام بالا نے دئے تھے۔