سندھ کے بعد اب سرحد میں پولیو

پاکستان کے صوبہ سرحد کے ضلع نوشہرہ میں پولیو کا ایک کیس سامنے آیا ہے جس کے بعد ملک میں اس سال اس مہلک وائرس کا شکار ہونے والے بچوں کی تعداد نو ہوگئی ہے۔

سندھ میں پولیو کا ایک اور کیس

پولیو کا تازہ شکار اٹھارہ ماہ کا افغانی بچہ نعمت اللہ ولد موسٰی جان ہوا ہے جس کا تعلق ضلع نوشہرہ کے گاؤں ازا خیل میں رہائش پذیر ایک افغان پناہ گزین خاندان سے ہے۔

حکام کے مطابق نعمت اللہ کے فضلے کے نمونے لیبارٹری ٹیسٹ کے لیے پچھلے مہینے کی ستائیس تاریخ کو نیشنل انسٹی ٹیوٹ آف ہیلتھ بھیجے گئے تھے جہاں سے جاری ہونے والے رپورٹ کے مطابق بچے کے جسم میں پولیو کے وائرس کی موجودگی کی تصدیق کی گئی ہے۔

اس سے پہلے سامنے آنے والے پولیو کے آٹھوں کیسز کا تعلق صوبہ سندھ سے ہے۔
سندھ میں اس سال پولیو کا پہلا کیس کراچی کے علاقے کورنگی میں رپورٹ ہوا تھا جس کے بعد حیدرآباد، نوابشاہ، شکارپور، جیکب آباد، نوشہرو فیروز، میرپورخاص اور دادو میں دیگر سات کیسز سامنے آئے۔

حکام کا کہنا ہے کہ سندھ میں بھی یہ وائرس قندھار افغانستان سے تعلق رکھنے والے ایک افغان بچے سے پھیلا تھا۔

واضح رہے کہ دنیا میں صرف چار ممالک ایسے ہیں جن میں پولیو کا مرض پایا جاتا ہے ان میں پاکستان، بھارت، افغانستان اور نائجیریا شامل ہیں۔ حکومت پاکستان نے عالمی ادارہ صحت سے یہ وعدہ کیا تھا کہ وہ 2000ء تک ملک سے پولیو کا خاتمہ کردے گی تاہم اب تک حکومت اس پر قابو نہیں پاسکی ہے۔

حال ہی میں قاہرہ میں ہونے والی ایک بین الاقوامی کانفرنس میں عالمی ادارہ صحت نے پاکستان میں پولیو کے وائرس کے پھیلاؤ پر اپنی تشویش کا اظہار کیا تھا۔