سوات: خودکش حملہ نو ہلاک

پاکستان میں صوبہ سرحد کے ضلع سوات میں حکام کا کہنا ہے کہ ایک کار بم خودکش حملے میں تین پولیس اہلکار سمیت نوافراد ہلاک اوردو زخمی ہوگئے ہیں ہلاک ہونے والوں میں چھ عام شہری شامل ہیں۔

سوات میڈیا سینٹر کے ترجمان میجر امجد اقبال نے بی بی سی کو بتایا کہ یہ واقعہ اتوار کی دوپہر تقریباً ایک بجے کے قریب نینگ والئی گاؤں میں سڑک کے کنارے قائم سکیورٹی فورسز کی ایک چیک پوسٹ پر پیش آیا۔

ان کے مطابق ایک مبینہ خودکش حملہ آوار نے اپنی گاڑی سکیورٹی فورسز کی چیک پوسٹ سے ٹکرائی جس سے ایک زوردار دھماکہ ہوا۔ ان کے بقول دھماکے میں ایک پولیس اہلکار اور پانچ عام شہری ہلاک جبکہ ایک دوسرا پولیس اہلکار زخمی ہوا ہے۔

انہوں نے کہا کہ چیک پوسٹ پر پولیس اور فرنٹئیر کور کے اہلکار تعینات تھے۔
دھماکے کے بعد سکیورٹی فورسز نے سارے علاقے کو گھیرے میں لیکر سیل کردیا اور سڑک پرگاڑیوں کی آمدورفت بند کردی۔

زخمیوں میں ایک پولیس اے ایس آئی بھی شامل ہیں جن کی حالت تشویش ناک بتائی جارہی ہے۔ زخمیوں کو سیدوشریف ہسپتال منتقل کردیا گیا ہے۔ تاحال کسی نے واقعہ کی ذمہ داری قبول نہیں کی ہے۔

تقریباً دو ہفتے قبل عسکریت پسندوں کی جانب سے سوات کی تین تحصیلوں کا کنٹرول راتوں رات چھوڑنے کے بعد یہ پہلا دھماکہ ہے۔

کچھ روز قبل شدت پسندوں نے ذرائع ابلاغ کو ایک آڈیو بیان جاری کیا تھا جس میں مولانا فضل اللہ کے ترجمان سراج الدین نے دھمکی دی تھی کے سکیورٹی فورسز کے خلاف ان کی کارروائیاں جاری رہیں گی۔

بیان میں عام شہریوں کو بھی خبردار کیا گیا تھا کہ سکیورٹی فورسز کا ساتھ نہ دیں اور ان کی چیک پوسٹوں کے قریب بھی نہ جائیں ورنہ نقصان کی صورت میں وہ ذمہ دار نہیں ہونگے۔

سوات میں سکیورٹی فورسز کی طرف سے تمام اہم علاقوں کا انتظام سنبھالنے کے بعد توقع کی جارہی تھی کہ شورش ختم ہوگئی ہے تاہم تازہ واقعہ سے علاقے میں ایک بار پھر حالات کشیدہ ہوگئے ہیں۔