Saturday, 27 October, 2007, 03:19 GMT 08:19 PST

بینظیر بھٹو سندھ کے دورے پر روانہ

پاکستان کی سابق وزیر اعظم اور پیپلز پارٹی کی چیئرپرسن بینظیر بھٹو سنیچر کی صبح انتہائی سخت حفاطتی انتظامات میں کراچی سے بذریعہ جہاز اپنے آبائی شہر لاڑکانہ کے لیے روانہ ہو گئی ہیں۔

اٹھارہ اکتوبر کو کراچی میں بینظیر بھٹو کے استقبالیہ جلوس پر خودکش حملوں کے بعد انہوں نے اپنے سندھ کے دورے کو مؤخر کر دیا تھا۔

لاڑکانہ: وزیراعظم جیسی سکیورٹی

سنیچر کو ان کی لاڑکانہ روانگی کا پہلے سے کوئی اعلان نہیں کیا گیا تھا تاہم ان کی وطن آمد کے بعد سے اندرون سندھ اور خاص طور پر لاڑکانہ میں ان کے حامی اور پارٹی کارکن ان کا شدت سے انتظار کر رہے تھے اور ان کے استقبال کی تیاریاں جاری تھیں۔

بین الاقومی خبر رساں اداروں کے مطابق سنیچر کی صبح انتہائی سخت سکیورٹی میں کلفٹن میں اپنی رہائش گاہ سے کراچی کے ہوائی اڈے کے لیے روانہ ہوئیں۔ ان کی گاڑیوں کا قافلہ جو انتہائی تیز رفتاری سے ہوائی اڈے کی طرف روانہ ہوا اس میں ایک درجن سے زیادہ پولیس کی گاڑیاں بھی شامل تھیں۔

اس موقع پر ان کے راستے پر رینجرز اور پولیس کی بھارتی نفری تعینات تھی اور ایئر پورٹ جانے والے راستوں پر ناکہ بندی بھی کی گئی تھی۔