Monday, 06 August, 2007, 10:40 GMT 15:40 PST

رفعت اللہ اورکزئی
بی بی سی اردو ڈاٹ کام، پشاور

دھماکہ: سکوارڈن لیڈر سمیت3 زخمی

صوبہ سرحد کے دارالحکومت پشاور میں پولیس کے مطابق ایک بم دھماکے میں سکوارڈن لیڈر سمیت تین افراد زخمی ہوگئے ہیں۔

تھانہ بالا مانڑی کے ایک اہلکار نے بی بی سی کو بتایا کہ یہ واقعہ پیر کی صبح سات بجے کے قریب پیش آیا۔ ان کے مطابق نامعلوم افراد نے کوہاٹ روڈ پر ملک مارکیٹ میں دھماکہ خیز مواد نصب کر رکھا تھا جس کے پھٹنے سے پاکستان ائر فورس (پی اے ایف) کی ایک گاڑی میں سوار تین افراد زخمی ہوگئے۔ زخمیوں میں سکوارڈن لیڈر مشتاق، ڈرائیور اور ایک بچہ شامل ہیں۔

دھماکے سے دو گاڑیوں کو بھی جزوی طور پر نقصان پہنچا ہے۔ پولیس کا کہنا ہے کہ زخمیوں کو ابتدائی طبی امداد کے بعد ہپستال سے فارغ کر دیا گیا۔ پولیس نے مقدمہ درج کرکے واقعہ کی تحقیقات شروع کردی ہیں۔