کرنل ہارون کی میت لاہور میں

اسلام آباد کے لال مسجد آپریشن کے دوران ہلاک ہونے والےلفیٹفنٹ کرنل ہارون الاسلام کی میت لاہور میں کمبائنڈ ملٹری ہسپتال کے سرد خانے میں رکھ دی گئی ان کے ورثاء کے مطابق ان کی دوبہنوں کے بیرون ملک سے واپسی کا انتظار ہے اس لیے تدفین میں ایک دو روز لگ سکتے ہیں۔

کرنل ہارون اسلام آباد میں چھ روز سے جاری آپریشن سائیلنس میں کمانڈوز کےگروپ کے انچارج تھے اور ایک جھڑپ میں زخمی ہونے کے بعد کل رات دم توڑ گئے تھے۔

لاہور منتقل کیے جانے سے پہلے اتوار کی صبح ان کی نماز جنازہ راولپنڈی کے چکلالہ ائر بیس پرادا کی گئی جس میں صدرجنرل پرویز مشرف نے بھی شرکت کی۔

نماز جنازہ میں وائس چیف آف آرمی سٹاف جنرل احسان سلیم حیات سمیت سنیئر اور سول افسروں کی ایک بڑی تعداد نے شرکت کی۔ان کے بھائی ظفر میت کے ہمراہ لاہور آئے تھے۔

کرنل ہارون کے پسماندگان میں ایک بیوہ اور چار اور پانچ برس کی دوبیٹیاں شامل ہیں۔

لاہور میں اقبال ٹاؤن کے راوی بلاک میں ان کےگھر سوگوار آرہے ہیں ۔اہلخانہ نے ذرائع ابلاغ کے نمائندوں سے گفتگو کرنے یا کسی قسم کا بیان دینے سے انکار کردیا ہے۔ان کے بھائی ظفر نے فوٹوگرافروں اور کیمرہ مین کو گھر اور سوگواروں کی تصاویر بنانے سے بھی روک دیا۔

فوج کےمحکمہ تعلقات عامہ یعنی آئی ایس پی آر لاہور کے انچارج کرنل سجاد نے بی بی سی کوبتایا کہ محکمہ کی طرف سے کوئی پابندی نہیں ہے یہ ان کے اہلخانہ کا ذاتی معاملہ ہے اور اس کا تعلق جذباتی کیفیت سے ہے۔

لیفٹنٹ کرنل ہارون الاسلام سنہ انیس سو اٹھاسی میں فوج کی سندھ رجمنٹ میں شامل ہوئے اور پانچ برس بعد فوج کے سپیشل سروسز گروپ کو جوائن کرلیا ان دنوں وہ کمانڈوز کی ایک بٹالین کے کمانڈنٹ تھے۔

چھ روز سے لال مسجد میں جاری آپریشن میں اب تک ہلاک ہونے والوں میں وہ سب سے بڑے عہدے کے فوجی افسر ہیں۔

لال مسجد میں محصور طلبہ وطالبات کی ہلاکتوں کی تعداد کے بارے میں متضاد اطلاعات ہیں لیکن حکام بیس کے قریب ہلاکتوں کی تصدیق کرتے ہیں لال مسجد کے غازی عبدالرشید اور ان کے ساتھی مزاحمت کار اپنے ہلاک شدگان کو شہید قرار دیتے ہیں۔

آئی ایس پی آر نے اپنی پریس ریلیز میں کرنل ہارون کی ہلاکت کو بھی شہادت قرار دیا ہے۔