Thursday, 21 June, 2007, 11:51 GMT 16:51 PST

عبادالحق
بی بی سی اردو ڈاٹ کام، لاہور

سپیکر کی رکنیت منسوخ، مظاہرہ

جمعرات کو پاکستان کی قومی اسمبلی کے سپیکر چودھری امیر حسین کی لاہور ہائی کورٹ بار ایسوسی ایشن کی رکنیت منسوخ کردی گئی ہے۔

ہائی کورٹ بار ایسوسی ایشن نے یہ فیصلہ سپیکر کی طرف سے تحریک انصاف کے سربراہ عمران خان کے خلاف ایم کیو ایم کا ریفرنس الیکشن کمیشن کوبھجوانے پر کیا ہے۔

ہائی کورٹ بار ایسوسی ایشن کےاجلاس میں پیپلز لائرز فورم کے رہنما راجہ ذوالقرنین نے تجویز پیش کی کہ عمران خان وکلاء کی تحریک کے لئے بھرپور کردار کرر ہے ہیں اور اسی وجہ سے ان کے خلاف حکومت کی اتحادی جماعت ایم کیو ایم نے ریفرنس دائر کیا ہے جسے سپیکر نے چیف الیکشن کو مزید کارروائی کے لئے بجھوا دیا ہے۔ وکیل کا مطالبہ تھا کہ ایسا کرنے پر سپیکر قومی اسمبلی کی لاہور ہائی کورٹ بار کی رکنیت منسوخ کی جائے ۔

بار کے صدر احسن بھون نے تجویز ہاؤس کے سامنے پیش کی جس کو متفقہ طور پر منظور کرلیا گیا۔

	گرمی کے باوجود وکلاء کی تعداد اور جوش و خروش میں کوئی کمی دیکھنے میں نہیں آئی

علاوہ ازیں چیف جسٹس افتخار محمد چودھری کے ساتھ اظہار یکجہتی کے لئے جمعرات کو پنجاب میں وکلاء نےعدالتوں کا بائیکاٹ کیا اوراحتجاجی جلوس نکالے۔

لاہور میں وکلاء اور سیاسی جماعتوں نے پنجاب اسمبلی تک پرامن جلوس نکالا۔ وکلاء کا جلوس ایوان عدل سے روانہ ہوا اورلاہور ہائی کورٹ کے سامنے ہائی کورٹ بارایسوسی ایشن کا جلوس بھی اس میں شامل ہوگیا۔اس موقع پر سیاسی جماعتوں اور سول سوسائٹی کی مختلف تنظیموں کے کارکنوں نے بھی اپنی جماعتوں کے جھنڈوں کے ساتھ شامل ہوگئے۔گرمی کے باوجود وکلاء کی تعداد اور جوش و خروش میں کوئی کمی دیکھنے میں نہیں آئی۔

جلوس میں پیپلز پارٹی، جماعت اسلامی، مسلم لیگ (ن)، تحریک انصاف، خاکسار تحریک اور لیبر پارٹی کے رہنماؤں اور کارکنوں کے علاوہ پاکستان میڈیکل ایسوسی ایشن، پنجاب پروفیسرز لیکچررز ایسوسی ایشن، پنجاب ٹیچرز ایسوسی ایشن، پنجاب یونیورسٹی اکیڈیمک اسٹاف، یلیو کیب فیڈریشن سمیت سول سوسائٹی کی تنظیموں نے بھی شرکت کی۔

مظاہرین مشرف حکومت کے خلاف نعرے لگا رہے تھے اور انہوں نے کتبے اور بینرز بھی اٹھا رکھے تھے جن پر جسٹس افتخار محمد چودھری کے حق میں اور جنرل مشرف کے مخالف نعرے درج تھے۔

	سابق ججوں، سینیئر وکلاء کے علاوہ خواتین وکلاء کی ایک بڑی تعداد نے بھی شرکت کی

مال روڈ پر جلوس کے راستے میں دکانیں کھلی رہیں جبکہ جلوس کے شرکاء پر گل باشی بھی کی گئی۔

مظاہرین نے جلوس کے راستے میں وزیر اعلیْ پنجاب پرویز الہیْ کے حق میں لگے بینرز اتار کر انہیں نذر آتش کردیا۔

حزب مخالف کی جماعتوں کے ارکان اسمبلی اور رہنماؤں مخدوم شاہ محمود قریشی، رانا ثناء اللہ، جہانگیر بدر، رانا مشہود احمد خان، عظمیْ بخاری، سیمع اللہ اور رانا آفتاب نے مظاہرین کا پنجاب اسمبلی کے باہر چوک میں استقبال کیا۔

جلوس میں اعلیْ عدلیہ کے سابق ججوں، سینیئر وکلاء کے علاوہ خواتین وکلاء کی ایک بڑی تعداد نے بھی شرکت کی۔

سلمان رشدی کے خطاب کی مذمت
اسی اثناء میں لاہور ہائی کورٹ بار ایسوسی ایشن کے اجلاس میں سلمان رشدی کو سر کا خطاب دینے کی مذمت کرتے ہوئے برطانوی حکومت سے خطاب واپس لینے کا مطالبہ کیاگیا ہے۔

	لاہور کے علاوہ پنجاب کے دیگر شہروں سے بھی مظاہروں کی اطلاعات ملی ہیں

اجلاس میں ہائی کورٹ بار کے سیکرٹری سرفراز چیمہ کو دھمکیاں دینے کی بھی شدید مذمت کی گئی۔

دوسری طرف پنجاب بارکونسل کے وائس چیئرمین طارق جاوید و ڑائچ نے چیف جسٹس لاہور ہائی کورٹ اور سپریم جوڈیشل کونسل کے رکن جسٹس افتخارمحمد چودھری کے خلاف ریفرنس کونسل کے سامنے دائر کرنے کا اعلان کیا۔ اس مقصد کے لئے چھ رکنی کمیٹی تشکیل دی ہے جو ریفرنس تیار کرئےگی۔

پنجاب اسمبلی کے باہر وکلاء رہنماؤں نے خطاب کیا جس کے بعد وکلاء اور سیاسی جماعتوں کے کارکن پرامن طور پر منتشر ہوگئے۔

لاہور کے علاوہ پنجاب کے دیگر شہروں سے بھی مظاہروں کی اطلاعات ملی ہیں۔وکلاء نے عدالتوں میں ہڑتال کی اور پیش نہیں ہوئے جبکہ عدالتوں میں علامتی بھوک ہڑتالی کیمپ بھی لگائے گئے۔