کراچی ضرور جاؤنگا: عمران خان

پاکستان تحریک انصاف کے سربراہ اور سابق کرکٹر عمران خان کے صوبہ سندھ میں داخلے پر ایک ماہ کے لیے پابندی لگا دی گئی ہے۔

تاہم عمران خان کا کہنا ہے کہ وہ کراچی اور سندھ کے دوسرے علاقوں میں ضرور جائینگے اور اگر انہیں کوئی نقصان پہنچا تو اس کی ذمہ داری صدر پرویز مشرف اور ایم کیو ایم کے رہنماء الطاف حسین پر ہوگی۔

عمران خان معافی مانگیں: ایم کیو ایم

عمران خان نے اتوار کو کراچی کے دورے کا اعلان کر رکھا تھا۔ پروگرام کے مطابق انہوں نے کراچی میں ’مئی بارہ‘ کے پر تشدد واقعات میں ہونے والی ہلاکتوں کی تعزیت کے لیے پیپلز پارٹی، جماعت اسلامی اور عوامی نیشنل پارٹی کے دفاتر جانا تھا۔

چیف جسٹس آف پاکستان جسٹس افتخار چودھری کی بارہ مئی کے روز کراچی آمد کے موقع پر ہونے والی خونریزی کے بعد عمران خان صدر مشرف کی حلیف جماعت ایم کیو ایم کو مسلسل تنقید کا نشانہ بنا رہے ہیں۔

انہوں نے یہ بھی اعلان کر رکھا ہے کہ وہ عنقریب لندن میں مقیم الطاف حسین کے خلاف برطانوی قوانین کے تحت مقدمہ دائر کرینگے کہ انہوں نے ایم کیو ایم کے کارکنوں کو چیف جسٹس کی کراچی آمد کے موقع پر تشدد کرنے پر اکسایا۔

ایم کیو ایم نے ان بیانات پر سخت ردعمل کا اظہار کیا ہے اور متعدد شہروں میں اس کے کارکنوں نے عمران خان کے خلاف احتجاجی مظاہرے کیے ہیں۔ کراچی شہر میں کئی جگہوں پر عمران خان کے خلاف وال چاکنگ کی گئی ہے، جس میں استعمال کی گئی زبان مبصرین کے مطابق انتہائی نا مناسب ہے۔