مشرف حکومت سے رابطوں کی تصدیق

پاکستان پیپلز پارٹی کی جلاوطن چئر پرسن بے نظیر بھٹو نے مختلف اوقات میں مختلف سطح پر مشرف حکومت سے رابطوں کی تصدیق کی ہے تاہم ساتھ ہی ساتھ انہوں نے یہ بھی کہا ہے کہ یہ غیر رسمی رابطے ہیں جن کا کوئی نتیجہ نہیں نکلا۔

مشرف بے نظیر ڈیل پھر سرخیوں میں

پاکستان میں بے نظیر بھٹو کے ترجمان فرحت اللہ بابر نے بی بی سی سے گفتگو کرتے ہوئے کہا کہ پیپلز پارٹی کے موقف میں کوئی نئی تبدیلی نہیں آئی ہے اور پیپلز پارٹی کا آج بھی یہی موقف ہے کہ فوجی آمریت کا کسی صورت ساتھ نہیں دیا جاسکتا اور کوئی بھی باوردی صدر پیپلز پارٹی کے لیے قابل قبول نہیں ہے۔

بےنظیر بھٹو کا یہ بیان پاکستان کے ایک اردو ٹی وی چینل پر پیراور منگل کی درمیانی شب نشر ہوا تھا۔

فرحت اللہ بابر نے کہا کہ انٹرویو کے دوران بےنظیرنے بار بار پوچھے گئے اس سوال کے جواب میں کہ ان کی صدر مشرف سے آخری بار گفتگو کب ہوئی تھی، کہا کہ ’انہیں بالکل یاد نہیں کہ ان کی جنرل مشرف سے کب بات ہوئی تھی‘۔

بے نظیر کے ترجمان نے کہا کہ اس موقع پر بے نظیر نے مثال پیش کرتے ہوئے کہا کہ ’یہ بالکل ایسے ہی ہے جیسے انہیں یہ یاد نہیں کہ ٹی وی کے کمپئرسے ان کی اس سے قبل کب بات ہوئی تھی‘۔
بینظیر بھٹو
’مجھے بالکل یاد نہیں کہ جنرل مشرف سے کب بات ہوئی تھی‘

بے نظیرکے ترجمان نے کہا کہ یہ بات کرکے بے نظیر نے واضح طور پر یہ پیغام دیا ہے کہ وہ کسی فوجی حکمران کو کتنی کم اہمیت دیتی ہیں۔

بے نظیر بھٹو نے اپنے انٹرویو میں صدر مشرف کے قریبی ساتھی اور سول سروسز کے افسر طارق عزیز سے رابطے کی تردید یا تصدیق نہیں کی ہے۔

بے نظیر سے جب پوچھا گیا کہ کیا صدر مشرف بغیر وردی کے انہیں منظور ہونگے تو انہوں نے کہا کہ وہ اس سوال کا جواب نہیں دے سکتیں کیونکہ ایک تو ان کے سامنے باضابطہ طور پر ایسی کوئی تجویز پیش نہیں کی گئی اور دوسرا یہ کہ اس کا فیصلہ وہ نہیں بلکہ ان کی پارٹی کرے گی۔

سیاسی تجزیہ نگاروں کا کہنا ہے کہ ملک میں پہلے ہی بےنظیر اور صدر مشرف کے درمیان کسی مفاہمت کی افواہیں گرم ہیں اور بعض حکومتی وزیرکھل کر پیپلز پارٹی سے حکومت کی بات چیت کا ذکر کررہے ہیں ان حالات میں بے نظیر کا کسی بھی سطح پر حکومت سے رابطوں کی تصدیق ملکی سیاست کی نئی کروٹ کا طرف اشارہ ہے۔

بے نظیر نے اپنے تازہ انٹرویو میں حکمران مسلم لیگ کو بھی کڑی تنقید کا نشانہ بنایا ہے اور کہا ہے کہ ان کی حکومت ملکی معاملات میں بری طرح ناکام ہوئی ہے۔

دوسری طرف منگل کو ہی معزول اورجلاوطن وزیراعظم میاں نواز شریف نے مسلم لیگ نواز کی مجلس عاملہ سے ٹیلی فونک خطاب کرتے ہوئے اس عزم کا اظہار کیا ہے وہ حکومت سے کسی بھی قسم کی ڈیل نہیں کریں گے۔

میاں نواز شریف نےکہا ہے کہ انہوں نے بے نظیر اور مولانا فضل الرحمان سے کہا ہے کہ جو بھی حکومت سے ڈیل کرے گا وہ رسوا ہوگا۔ نواز شریف نے کہا کہ اپوزیشن کے دونوں بڑے دھڑوں کے سربراہوں نے ان کے خیالات سے اتفاق کیا ہے۔

میاں نواز شریف نے اپنے خطاب میں تجویز پیش کی ہے کہ اپوزیشن کی سیاسی جماعتوں اور سول سوسائٹی کے نمائندوں پر مشتمل حکومت مخالف جوائنٹ ایکشن کمیٹی تشکیل دی جائے۔


	’مجھے بالکل یاد نہیں کہ جنرل مشرف سے کب بات ہوئی تھی‘