پنجاب کی صوبائی وزیر ظل ہما قتل

پنجاب کی وزیر برائے سماجی بہبود ظل ہما عثمان منگل کی سہ پہر ایک قاتلانہ حملے میں زخمی ہونے کے بعد زخموں کی تاب نہ لا کر ہلاک ہو گئی ہیں۔

ظل ہما گوجرانوالہ میں مسلم لیگ ہاؤس میں لوگوں سے بات چیت کر رہی تھیں کہ مجمع میں سے ایک شخص نے اٹھ کر تیس بور پستول سے ان پر گولی چلائی جو ان کے سر میں لگی۔

صوبائی وزیر کو پہلےگوجرانوالہ کے ضلعی ہسپتال لے جایا گیا۔ بعد ازاں انہیں ہیلی کاپٹر کے ذریعے لاہور کے جنرل ہسپتال پہنچایا گیا جہاں وہ سرجری کے دوران دم توڑ گئیں۔

گوجرانوالہ کے ڈپٹی انسپکٹر جنرل پولیس خادم بھٹی کا کہنا ہے کہ مجمع میں موجود لوگوں نے ایک شخص کو پکڑ کر پولیس کے حوالہ کیا ہے جس پر گولی چلانے کا الزام ہے۔ حملہ آور کا نام غلام سرور اور عمر چالیس سال بتائی گئی ہے۔

پولیس افسر کے مطابق غلام سرور نے ابتدائی تفتیش میں کہا ہے کہ وہ سمجھتا ہے کہ عورتوں کا اعلی عہدوں پر فائز ہونا اللہ کے احکام کی خلاف ورزی اور مردوں کو محکوم بنانے کی کوشش ہے۔ تاہم پولیس افسران کا کہنا ہے کہ اب تک ملزم کا کسی مذہبی یا انتہا پسند تنظیم سے کسی تعلق کا پتہ نہیں چلا۔