’دھماکوں کی تحقیقات کرائیں‘

پاکستان کے وزیرِ ریلوے شیخ رشید احمد نے بھارتی حکومت سے مطالبہ کیا ہے کہ سمجھوتہ ایکسپریس میں آگ لگنے کے واقعہ کی فوری طور پر تحقیقات کرائی جائے۔

پیر کو بی بی سی سے فون پر بات کرتے ہوئے انہوں نے اس واقعہ کی مذمت کی اور کہا کہ بظاہر لگتا ہے کہ یہ تخریب کاری ہے۔

تاہم انہوں نے کہا کہ ریل گاڑی میں آگ لگنے کے اصل محرکات کے بارے میں تحقیقات کے بعد ہی پتہ چل سکے گا۔

ایک سوال پر انہوں نے بتایا کہ ریل گاڑی میں کل پانچ سو تریپن پاکستانی سوار تھے۔

انہوں نے کہا میڈیا کے مطابق چونسٹھ مسافروں کی ہلاکت کی اطلاعات ہیں۔ لیکن ان کے مطابق وہ ہلاک شدگان اور زخمیوں کی تعداد کے بارے میں فی الوقت کچھ بھی نہیں کہہ سکتے۔