کوئٹہ کو گیس جزوی طور پر بحال

کوئٹہ کے قریب نا معلوم افراد نے سنیچر کے روز بڑی گیس پائپ لائن کو دھماکے سے اڑا دیا تھا جس سے کوئٹہ شہر کوگیس کی ترسیل کئی گھنٹے تک معطل رہی اور شام گئے متبادل ذرائع سے شہر کو گیس کی سپلائی جزوی طور پر بحال کر دی گئی۔

سوئی سدرن گیس کمپنی کے جنرل مینیجر محمد نواز نے بتایا ہے کہ کوئٹہ میں سریاب کے قریب کلی قمبرانی میں سول انچ قطر کی ایک بڑی پائپ لائن کو اڑا دیا گیاتھا۔ انہوں نے کہا کہ اس پائپ لائن سے کوئٹہ شہر کو گیس فراہم کی جاتی ہے۔

پائپ لائن میں دھماکہ کے بعد کوئٹہ شہر کو گیس کی ترسیل معطل ہو گئی تھی۔

سپرنٹنڈنٹ پولیس وزیر خان ناصر نے بتایا ہے کہ گیس پائپ لائن کو دھماکہ خیز مواد سے اڑایاگیا جس سے پائپ لائن میں آگ بھڑک اٹھی لیکن گیس کی ترسیل بند کر دینے کے بعد آگ پر قابو پالیا گیا۔

اس کے علاوہ ادھر سبی سے آمدہ اطلاعات کے مطابق لہڑی کے قریب بارودی سرنگ کے دھماکے سے ایک شخص ہلاک اور ایک زخمی ہو گیا ہے۔