Thursday, 07 September, 2006, 14:03 GMT 19:03 PST

الزام لگانا بند کر دیں: مشرف

پاکستان کے صدر جنرل پرویز مشرف نے کہا ہے کہ افغانستان شدت پسندوں کے ساتھ مسئلے کا الزام پاکستان پر لگانا بند کر دے۔

افغانستان میں اپنے دورے کے دوسرے روز پرویز مشرف نے تسلیم کیا کہ القاعدہ اور طالبان کے جنگجو پاکستان میں بھی کارروائی کر رہے ہیں تاہم انہوں نے کہا کہ ان لوگوں کو پاکستان حکومت یا سکیورٹی فورسز کی حمایت حاصل نہیں ہے۔

انہوں نے کہا: ’میں پوری طرح متفق ہوں کہ القاعدہ اور طالبان پاکستان اور افغانستان دونوں ممالک میں موجود ہیں۔ یقیناً وہ پاکستان سے سرحد عبور کر کے آپ کے ملک میں بم دھماکے اور دہشت گرد کارروائیاں کرتے ہیں۔ لیکن یہ سپانسرڈ (پاکستان کی حمایت سے) نہیں ہے‘۔

	شمالی وزیرستان سے طالبان اور القاعدہ کے اکثر اراکین افغانستان جاتے ہیں

انہوں نے کہا صرف القاعدہ یا طالبان کے جنگجوؤں کی عسکری کارروائیوں کو روکنا ہے ضروری نہیں ہے بلکہ پاکستان معاشرے کی ’طالبانائزیشن‘ کو روکنا بھی ضروری ہے۔

یاد رہے کہ افغانستان الزام لگاتا رہا ہے کہ شدت پسند سرحد پار پاکستان سے تربیت حاصل کر کے آ رہے ہیں اور اسلام آباد ان کے خلاف کوئی خاطر خواہ اقدامات نہیں کر رہا۔