ہارون رشید
بی بی سی اردو ڈاٹ کام، پشاور

منشیات سمگلر انسپکٹرگرفتار

پشاور میں اینٹی نارکوٹکس فورس نے موٹروے پولیس کے ایک حاضر سروس انسپکٹر سے چار من منشیات برآمد کر لی ہیں۔

اے این ایف کی جانب سے جاری ایک بیان کے مطابق یہ کارروائی پیشگی خفیہ اطلاع کی بنیاد پر کی گئی۔ معلومات کے مطابق بھاری مقدار میں منشیات موٹروے پولیس کے ایک اہلکار کے ذریعے سمگل کی جانی تھی۔

اس اطلاع پر اے این ایف کے تمام متعلقہ حکام کو چوکنا کر دیا گیا تھا اور پنجاب جانے والے تمام راستوں کی نگرانی سخت کر دی گئی۔

سنیچر کو پشاور سے پنجاب جاتی ہوئی ایک مشتبہ گاڑی آئی ڈی ایف 7160
کو پبی کے قریب جی ٹی روڈ پر روکا گیا۔گاڑی کے ڈرائیور نے اپنا نام اختر اقبال خٹک بتایا اور موٹروے پولیس کا شناختی کارڈ دکھا کر اے این ایف کے اہلکاروں کو ڈرانے دھمکانے کی کوشش کی۔

تاہم گاڑی کی تلاشی پر اس میں سے ایک سو باسٹھ کلو چرس، تقریبا پانچ کلو افیون اور ایک کلو ہیروئن برآمد ہوئی جس پر ملزم کوگرفتار کر لیا گیا۔

اے این ایف حکام کا کہنا ہے کہ مزید تفتیش جاری ہے اور اس سلسلہ میں مزید گرفتاریاں بھی عمل میں آسکتی ہیں۔