قبائلی علاقے: امریکی صنعتی زونز

سرحد ایوانِ صنعت وتجارت کے صدر غضنفر بلور نے کہا ہے کہ امریکہ نے حکومت پاکستان کے تعاون سے قبائلی اور ملحقہ علاقوں میں انتہا پسندی اور دہشت گردی کا خاتمہ کرنے اور ان علاقوں میں اقتصادی سرگرمیوں کو فروغ دینے کے لیئے ایک منصوبہ تیار کیا ہے۔

سنیچر کو پشاور میں ایک پریس بریفنگ کے دوران سرحد ایوانِ صنعت وتجارت کے صدر نے امریکی حکومت کی ری کنسٹرکشن اپرچونیٹی زونز کے تحت اقتصادی پروگرام کا خیر مقدم کیا اور مطالبہ کیا کہ نئے صنعتی علاقے قائم کرنے کے ساتھ ساتھ صوبے کی ان صنعتوں کی بحالی پر بھی توجہ دی جائے جو بند پڑی ہیں۔

غضنفر بلور نے بتایا کہ ان آر او زیڈز کے قیام کے لیئے انفرسٹراکچر حکومت پاکستان فراہم کرے گی جب کہ ان میں تیار کردہ مصنوعات کے لیئے امریکہ کو ڈیوٹی فری ایکسپورٹ کی سہولت حاصل ہوگی۔

غضنفر بلور کا کہنا تھا کہ امریکی ماہرین کی دو ٹیموں نے پشاور سمیت صوبہ سرحد کے مختلف علاقوں کا دورہ کیا اور وہاں پر ری کنسٹرکشن اپرچونیٹی زونز یا (آر او زیڈز) کے قیام کا جائزہ لیا۔

پچاس فیصد افرادی قوت قبائلی

ان علاقوں میں لگائی جانے والی صنعتوں میں پچاس فیصد افرادی قوت قبائلیوں پر مشتمل ہوگی جس سے قبائلی علاقوں میں غربت و بے روزگاری کے خاتمے میں مدد ملی گی

انہوں نے کہا کہ سرحد ایوانِ صنعت و تجارت سے وابستہ تاجروں اور صنعت کاروں نے باہمی مشاورت سے ایک قابل عمل حکمت عملی طے کر کے اس کی رپورٹ کو امریکہ کے نائب وزیرِخارجہ کو دی ہے اور آئندہ سال تک ان آر او زیڈز کے قیام پر کام کا آغاز ہو جائے گا۔ انہوں نے بتایا کہ امریکی ماہرین نے گدون آمازئی، رسالپور، حیات آباد، بنوں اور کوہاٹ میں قائم مختلف انڈسٹریل سٹیٹس کا دورہ کیا اور وہاں صنعتی یونٹوں کی کارکرگی کا جائزہ لیا اور بند یونٹوں کے حوالے سے معلومات حاصل کیں۔

ایوانِ صنعت و تجارت کے صدر کا کہنا تھا کہ انہوں نے امریکی ماہرین پر واضح کردیا کہ جب تک موجودہ انڈسٹریل سٹیٹس کو اپ گریڈ نہیں کیا جاتا تب تک صنعتی زونز کی ترقی ممکن نہیں اور نہ ہی سرمائے کے تحفظ، انفراسٹرکچر کی بحالی اور معاشی خوشحالی قائم ہوسکتی ہے۔

ان کا کہنا تھا کہ ان صنعتوں میں پچاس فیصد افرادی قوت قبائلیوں پر مشتمل ہوگی جس سے قبائلی علاقوں میں غربت و بے روزگاری کے خاتمے میں مدد ملے گی۔ ان صنعتوں میں ماربل، چمڑے کی مصنوعات، کھیلوں کا سامان، جِمز اور جیولری، الات جراحی اور ٹیکسٹائل کی مصنوعات تیار کرنے والی صنعتیں شامل ہوں گی۔