Tuesday, 18 July, 2006, 15:14 GMT 20:14 PST

ذوالفقار علی
بی بی سی اردو ڈاٹ کام ، مظفرآباد

حزب اللہ کے حق میں مظاہرہ

پاکستان کے زیر انتظام کشمیر کے عوام نے منگل کو لبنان پر اسرائیلی حملوں کے خلاف اور لبنان کی اسلامی تنظیم حزب اللہ کے حق میں مظاہرہ کیا۔

یہ مظاہرہ گزشتہ سال آٹھ اکتوبر کے زلزے میں سب سے زیادہ تباہ ہونے والے شہر مظفرآباد میں کیا گیا اور اس کا اہتمام شعیہ طلباء تنظیم امامیہ سٹوڈنٹس آرگنائزیشن نے کیا تھا۔

مظاہرے میں درجنوں افراد نے شرکت کی۔ مظاہرین نے اسرائیل اور امریکہ کے خلاف اور لبنان کی اسلامی تنظیم حزب اللہ کے حق میں نعرہ بازی کی۔ مظاہرین نے پلے کارڈز اور بینرز اٹھا رکھے تھے جن پر امریکہ اور اسرائیل کے خلاف نعرے درج تھے۔ ایک کتبے پر یہ تحریر تھا ’امریکہ اور اسرائیل اسلام کے بدترین دشمن ہیں‘ جبکہ ایک بینر پر یہ درج تھا کہ ’حزب اللہ کی حمایت اسلام کی حمایت ہے‘۔

مظاہرین نے لبنان پر اسرائیلی حملوں کو کھلی دہشت گردی قرار دیا اور وہ مطالبہ کررہے تھے کہ لبنان پر حملے فوری طور پر بند کئے جائیں۔

مظاہرین امریکہ اور اسرائیل کے پرچموں کو قدموں کے نیچے روندتے رہے اور بعد ازاں ان پرچموں کو نظر آتش کردیا گیا۔ پولیس کی ایک بھاری نفری مظاہرین کے ساتھ ساتھ رہی تاہم یہ مظاہرہ پر امن طور پر ختم ہوگیا۔