Monday, 05 June, 2006, 10:11 GMT 15:11 PST
اعجاز مہر
بی بی سی اردو ڈاٹ کام، اسلام آباد
ایک لاکھ سکول بجلی سے محروم
پاکستان کی حکومت نے رواں مالی سال کے بارے میں جاری کردہ اقتصادی سروے میں بتایا ہے کہ ملک میں ایک لاکھ ساڑھے سات ہزار سے زیادہ سکولوں میں بجلی کی سہولت دستیاب نہیں ہے۔
تعلیمی اداروں میں سہولتوں کا ذکر کرتے ہوئے بتایا گیا ہے کہ 68211 سکولوں میں پینے کا پانی میسر نہیں، بیاسی ہزار دو سکولوں میں بیت الخلاء نہیں ہیں، اٹھارہ ہزار کے قریب سکول کھلے آسمان تلے ہیں اور اسی ہزار سے زیادہ سکولوں کی چار دیورای نہیں ہے۔
حکومتی اعداد وشمار کے مطابق پاکستان میں خواندگی کی شرح مجموعی آبادی کے ساٹھ فیصد تک کرنے کے لیئے مقررہ کردہ حدف بھی رواں سال حاصل نہیں ہوسکا اور شرح خواندگی تریپن فیصد رہی ۔
 | تعلیم یافتہ خواتین، پنجاب سب سے آگے  چاروں صوبوں میں خواتین کی شرح خواندگی کے اعتبار سے پنجاب چوالیس فیصد شرح کے ساتھ تمام صوبوں سے آگے ہے۔ |
رپورٹ کے مطابق دنیا کے ان پڑھ افراد کی نصف آبادی جنوبی ایشیا میں رہتی ہے جوکہ پوری دنیا کی آبادی کا بائیس فیصد ہے۔ جنوبی ایشیا میں سری لنکا اور مالدیپ نے سو فیصد شرح خواندگی کا حدف پورا کرلیا ہے۔
پاکستان میں مجموعی پیداوار کا دو اعشاریہ ایک فیصد تعلیم پر خرچ کیا گیا۔ جبکہ دیگر ممالک میں یہ شرح اس سے زیادہ ہے۔
|  |
| اسی ہزار سے زیادہ سکولوں کی چار دیورای نہیں |
اقتصادی جائزے میں حکومت نے بتایا ہے کہ ملک بھر میں پرائمری سے یونیورسٹی تک دو لاکھ سات ہزار کے قریب تعلیمی ادارے ہیں۔ جس میں ایک لاکھ ستاسی ہزار پانچ سو کے قریب پرائمری اور مڈل سکول شامل ہیں جبکہ یونیورسٹیوں کی تعداد ایک سو تین بتائی گئی ہے۔
| شرح خواندگی، سندھ سب سے آگے چاروں صوبوں میں شرح خواندگی کے تناسب سے صوبہ سندھ چھپن فیصد کے ساتھ سب سے آگے ہے۔ |
پاکستان کے تمام تعلیمی اداروں میں دو کروڑ نوے لاکھ اور نوے ہزار کے قریب طلباء نے داخلہ لیا اور انہیں پڑھانے کے لیئے تمام سطحوں کے تعلیمی اداروں میں اساتذہ کی تعداد گیارہ لاکھ سات ہزار کے قریب ہے۔
حکومتی رپورٹ کے مطابق مجموعی طور پر ملک میں شرح خواندگی تریپن فیصد ہے جس میں سے مردوں میں یہ شرح پینسٹھ اور خواتین میں چالیس فیصد ہے۔ چاروں صوبوں میں شرح خواندگی کے تناسب سے صوبہ سندھ چھپن فیصد کے ساتھ سب سے آگے ہے۔
صوبہ پنجاب میں پچپن، سرحد میں پینتالیس اور بلوچستان میں باون فیصد شرح خواندگی ہے۔ چاروں صوبوں میں خواتین کی شرح خواندگی کے اعتبار سے پنجاب چوالیس فیصد شرح کے ساتھ تمام صوبوں سے آگے ہے۔
خواتین کی شرح خواندگی میں صوبہ سندھ اکتالیس فیصد کے ساتھ دوسرے اور سرحد چھبیس فیصد کے ساتھ تیسرے اور بلوچستان میں خواتین کی شرح خواندگی سب سے کم یعنی انیس فیصد ہے۔