جنداللہ کے امیر کو موت کی سزا

کراچی کی ایک عدالت نے رینجرز کی موبائیل پر حملے کے الزام میں کالعدم شدت پسند تنظیم جنداللہ کے امیر عطاالرحمان اور نائب شہزاد باجوہ کو موت اور عمر قید کی سزا سنائی ہے۔

دونوں ملزمان پر الزام تھا کہ انہوں نے انیس مارچ دو ہزار چار کو بلوچ کالونی کے علاقے میں رینجرز کی ایک موبائیل پر حملہ کیا جس میں دو اہلکار مارے گئے اور تین زخمی ہوگئے تھے۔

انسداد دہشتگردی کی عدالت نمبر دوئم کے جج فیروز محمود بھٹی نے پیر کے روز فیصلہ سناتے ہوئے بتایا کہ قتل کے الزام میں ملزمان کو سزائے موت، تین افراد کو زخمی کرنے کے الزام میں پینتیس سال قید کی سزا دی جاتی ہے۔

ملزمان کو مقتولین کے ورثا کو ایک ایک لاکھ دیت اور زخمیوں کو بیس بیس ہزار معاوضہ دینا کا حکم بھی سنایا گیا۔

عدالت نے ہینڈ گرنیڈ کے استعمال اور رینجرز کی ڈیوٹی میں مداخلت کے الزام میں الگ سزائے موت اور عمر قید کی سزا سنائی۔

اس مقدمے میں سات چشم دید گواہوں سمیت انیس گواہوں نے اپنے بیانات قلمبند کروائے۔

واضح رہے کہ پندرہ دن قبل اسی عدالت نے کراچی کے کور کمانڈر پر حملے کے الزام میں جنداللہ کے امیر عطاالرحمان اور نائب شہزاد باجوہ سمیت گیارہ کارکنان کو سزائے موت سنائی تھی۔