سندھ میں کیبل آپریٹروں کی ہڑتال

صوبہ سندھ میں کیبل آپریٹرز نے تمام غیر ملکی چینلوں کے ساتھ پاکستانی چینلوں کی نشریات بھی بند کردی ہے۔

کیبل آپریٹروں نے جمعرات کی شام ایک پریس کانفرنس میں پاکستان الیکٹرانک میڈیا ریگولیٹری اتھارٹی کے رویے اور غیر ملکی چینلز کی نشریات پر پابندی کے خلاف ہڑتال سے متنبہ کیا تھا۔

کیبل آپریٹرز ایسوسی ایشن کے چئرمین خالد شیخ نے بی بی سی سے بات کرتے ہوئے بتایا کہ ہم نے پیر سے ہڑتال کی دہمکی دی تھی مگر پیمرا نے اندرون سندھ چھاپے مارکر کچھ ہائیڈرنٹ بند کردیے جس کے بعد ہم نے احتجاجاً تمام چینلز کی نشریات بند کردی ہیں۔

انہوں نے بتایا کہ حکومت نے ہم سے کوئی رابطہ نہیں کیا ہے مگر کچھ لوگ درمیان میں ہیں۔

دوسری جانب سندھ کے وزیر داخلہ رؤف صدیقی نے ایک اعلامیے میں عوام سے اپیل کی ہے کہ وہ اس ماہ کیبل کی فیس ادا نہ کریں اگر انہیں کوئی پریشان کرے تو پولیس کے شکایتی مرکز سے رابطہ کیا جائے۔

پاکستان کیبل آپریٹرز ایسو سی ایشن کے چئرمین خالد شیخ کا کہنا ہے کہ ہم چور یا ڈاکو تو نہیں ہے جو عوام کو شکایتی سینٹر میں شکایت کرنے کو کہا جا رہا ہے اگر نشریات نہیں چل رہی تو عوام فیس نہ ادا کریں۔

انہوں نے اس عزم کا اظہار کیا کہ بامقصد مذاکرات تک ہڑتال جاری رہے گی۔

واضح رہے کہ پیمرا کا کہنا ہے کہ اس نے پاکستان بھر کے کیبل آپریٹروں پر جملہ حقوق (کاپی رائٹ ایکٹ) کی خلاف وزی کرنے کی وجہ سے بیس کے قریب غیر ملکی ٹی وی چینلوں کی نشریات دکھانے پر پابندی عائد کر دی تھی اور ان کیبل آپریٹرز کے خلاف کارروائی کی جارہی ہے جو اس پابندی کی خلاف ورزی کر رہے ہیں۔