دھماکے سے بجلی کے کھمبے کو نقصان

صوبہ بلوچستان میں کوئٹہ اور کولپور کے مابین نا معلوم افراد نے بجلی کے ایک کھمبے کو دھماکے سے نقصان پہنچایا ہے لیکن اس سے بجلی کی ترسیل متاثر نہیں ہوئی ہے۔

کوئٹہ سے ساٹھ کلومیٹر دور کولپور کے پاس بجلی کے پول نمبر تین سو چھیانوے کے دو حصوں کو دھماکہ خیز مواد سے اڑا دیا گیا ہے جبکہ دو حصے محفوظ رہے ہیں۔

بجلی کے محکمے کے ترجمان جبرائیل خان نے بتایا ہے کہ یہ ایک سو بتیس کے وی کی ڈبل سرکٹ لائن ہے۔ یہاں یہ اطلاعات موصول ہوئی ہیں کہ دھماکہ گزشتہ روز کیا گیا ہے لیکن محکمے کے اہلکاروں کو اس کا علم پیر کے روز ہوا ہے۔ اس واقعے کی ذمہ داری تاحال کسی نے قبول نہیں کی ہے۔

جبرائیل خان نے بتایا ہے کہ یہ معلوم نہیں ہے کہ دھماکہ کب اور کس وقت ہوا ہے تاہم گزشتتہ روز گشت کے دوران اس کا علم ہوا کہ بجلی کے کھمبے کو شدید نقصان پہنچا ہے۔ انھوں نے کہا ہے کہ چونکہ زیادہ تر پول دور دراز پہاڑوں اور ویرانوں میں اس لیے اس کا علم نہیں ہو سکا۔

لیکن یہاں یہ امر قابل ذکر ہے کہ بلوچستان کے مختلف علاقوں میں قومی تنصیبات پر دھماکے معمول سے ہو رہے ہیں جس کے بعد بجلی کے محکمہ کے حکام اور حکومت نے یہ دعوے کیے ہیں کہ ان تنصیبات کی حفاطت کے لیے سیکیورٹی بڑھا دی گئی ہے اور قانون نافذ کرنے والے اہلکاروں کو مختلف مقامات پر تعینات کیا گیا ہے۔

مبصرین کا کہنا ہے کہ حکام ان تنصیبات کی حفاطت تو دور کی بات یہ علم نہیں رکھتے کہ کہاں کتنا نقصان ہو چکا ہے۔

ادھر گزشتہ روز کوہلو کے علاقے میں ایک ٹرک بارودی سرنگ سے ٹکرا گیا تھا جس سے ڈرائیور اور کلینر زخمی ہو گئے تھے اور ٹرک کو شدید نقصان پہنچا تھا۔