Saturday, 29 October, 2005, 00:10 GMT 05:10 PST

فی خاندان ایک سال تک چھ ہزار

صوبہ پنجاب کے گورنر خالد مقبول نے کہا ہے کہ حکومتِ پنجاب ایک سال تک زلزلے سے متاثرہ ایک لاکھ خاندانوں کے اخراجات برداشت کرے گی اور اس منصوبے پر عمل درآمد ایک ہفتے میں شروع ہو جائے گا۔

یہ بات انہوں نے بالاکوٹ میں ایک ہسپتال میں زخمیوں کی عیادت کرتے ہوئے کہی۔ بی بی سی پشتو سروس کے عبدالحئی کاکڑ نے جو بالاکوٹ میں گورنر پنجاب کے دورے کے موقع پر وہاں موجود تھے بتایا کہ اس موقع پر گورنر کے سامنے لوگوں نے اپنی شکایات رکھیں اور بتایا کہ ان کا مناسب علاج نہیں ہو رہا اور نہ انہیں امداد ہی مل رہی ہے۔

گورنر نے بتایا کہ پنجاب کے وزیرِ اعلیٰ پرویز الٰہی نے حال ہی میں اعلان کیا تھا کہ ان کا صوبہ ایک لاکھ خاندانوں کو اپنائے گا اور ہر ماہ انہیں چھ ہزار روپے دیئے جائیں گے تاکہ وہ اپنی گزراوقات کر سکیں۔

خالد مقبول کا کہنا تھا کہ حکومت مظفرآباد، باغ اور مانسہرہ میں فیلڈ ہسپتال قائم کر رہی ہے۔

بی بی سی کے نامہ نگار کا کہنا ہے کہ انہوں نے علاقے میں جہاں جہاں ہسپتال دیکھے ہیں وہاں مریضوں کا تانتا بندھا ہوا ہے۔ گزشتہ ایک ہفتے کے دوران تشنج کے مریض بھی علاج کے لیے آئے ہیں۔

ڈاکٹروں کا کہنا ہے کہ ان کے پاس تشنج کے علاج کے لیے زیادہ تعداد میں انجیکشن بھی نہیں ہیں اور دیگر دوائیاں بھی ختم ہو رہی ہیں۔ تاہم ڈاکٹروں کو امید ہے جلد ہی انہیں دوائیاں مل جائیں گی۔