Saturday, 15 October, 2005, 04:59 GMT 09:59 PST

باغ: ساتویں شب آسمان تلے

زلزلہ سے متاثرہ ضلع باغ کی تحصیل حویلی سے تعلق رکھنے والے عبدالمالک نے بتایا ہے کہ ان کے علاقے میں ساتویں رات بھی لوگوں نے کھلے آسمان تلے زندگی گزاری ہے۔

عبدالمالک نے بی بی سی کو بتایا کہ بہت تباہی ہوئی ہے۔ 'سو فیصد مکان رہنے کے قابل نہیں ہیں، ہلاکتیں بہت ہوئی ہیں، جو لوگ فوت ہوئے ہیں وہ دفن ہوگئے ہیں۔ فوج والوں نے بنیادی طبی امداد فراہم کی ہے۔'

ان کا کہنا تھا کہ 'کوئی بھی تنظیم، این جی اوز یا کوئی حکومتی نمائندہ، کوئی ابھی تک یہاں نہیں پہنچا ہے۔ ابھی بھی لوگ آسمان تلے رہ رہے ہیں۔'

عبدالمالک نے بتایا کہ بہت سے لوگ ایسے ہیں جو ایک ہی کپڑے، شلوار قمیض میں گزشتہ ایک ہفتے سے رہ رہے ہیں۔ 'فرسٹ ایڈ ہوئی ہے لیکن کوئی ریلیف نہیں پہنچ رہی ہے کیوں کہ اس علاقے تک جو سڑک آتی ہے وہ بلاک ہوگئی ہے۔'

ان کا کہنا تھا کہ کچھ فوجی وہاں پہلے سے تعینات تھے اور کچھ باہر سے ہیلی کاپٹر سے آنے والے فوجیوں نے کافی مدد کی۔ 'آرمی والوں نے کام کیا ہے، زخمیوں کو طبی امداد فراہم کی ہے اور شدید زخمیوں کو ہسپتالوں تک پہنچایا۔'

عبدالمالک نے بتایا کہ ان کے گاؤں میں بھی لڑکیوں کی ایک اسکول گرگئی اور ان کے بھائی نے عمارت میں پھنسی ہوئی ایک طالبہ کو بچالیا تاہم ایک بچہ ملبے کے نیچے ہلاک ہوگیا۔ انہوں نے بتایا کہ صرف ان کے گاؤں میں بائیس افراد ہلاک ہوگئے۔