ملزم ہاشم ریمانڈ پر جیل میں

کراچی میں انسداد دہشتگردی کی عدالت نے امریکی صحافی ڈینیل پرل کیس کے مفرور ملزم ہاشم عرف عارف کو ستائیس اگست تک جوڈیشل ریمانڈ پر جیل بھیج دیا ہے۔

پولیس نے ہاشم کو منگل کے روز ملزم کو انسداد دہشتگردی کی خصوصی عدالت نمبر دو کے جج فیروز محمد کے پاس پیش کیا۔

پولیس نے عدالت سے ملزم کو جوڈیشل ریمانڈ پر بھیجنے کی گزارش کی جس کو عدالت نے منظور کرلیا اور ستائیس اگست پر ملزم کے خلاف الزامات کی تفصیل اور چالان پیش کرنے کی ہدایت کی۔

ہاشم کے وکیل رائے بشیر نے بی بی سی کو بتایا کہ انہوں نے اور ہاشم کے بھائی نے اپنے موکل سے ملاقات کی اور کیس کے حوالے سے بات چیت کی۔

واضح رہے کہ ہاشم عرف عارف کی گرفتاری گوجرانوالا سے ہوئی تھی جہاں سے ان کو کراچی لایا گیا تھا۔

اس سے قبل کراچی کی آرٹلری میدان پولیس نے ہاشم عرف عارف کا ریمانڈ محمد اسلم نامی ایک شخص کے قتل میں لیا گیا تھا۔

جس کے خلاف ہاشم کے بھائی نے سندھ ہائی کورٹ میں ایک آئینی درخواست دائر کی تھی۔ جس کو عدالت نے رد کردیا تھا۔